RSTV NEWS.Golaha wasiirada Soomaaliya oo isku raacay in dayactir xoogan lagu sameeyo cusbitaalka guud ee magaalada Baydhabo

Golaha wasiirada Soomaaliya oo isku raacay in dayactir xoogan lagu sameeyo cusbitaalka guud ee magaalada Baydhabo ka dib kulan manata ay yeesheen.

Golaha wasiirada dowladda fedaraalka kmg ah ee Soomaaliya oo maanta kulan ku yeeshay magaalada Baydhabo ayaa waxa ay kaga doodeen dayac tirka cusbitalka guud ee magaaalada oo ah mid gabi ahaanba haawinaya oo aan ka haqab tiri karin dadka ku dhaqan magaalada adeegyada caafimaad oo ay u baahan yihiin.

Kulankii maanta oo uu shir guddoominayay ku simaha ra’iisal wasaaraha ahna wasiirka iskaashi goboleedka Ismaaciil Hurre Buubaa ayaa waxaa ugu horreyn warbixino looga dhagaystay wasiirka caafimaadka dowladda kmg ah ee Soomaaliya C/Casiis Sheekh Yuusuf. Kulankaas oo socday qadar saacado ah ayaa waxaa gaba gabadiisa la hadlay warfidiyeenada ku simaha ra’iisal wasaaraha Buubaa oo ka warbixiyay waxa ay ka shireen iyo go’aanada ay soo saareen. “waxaanu kaga hadalnay kulankii maanta sidii loo qalabeyn lahaa cusbitalka guud ee magaalada, waxaanu la xiriirnay masuuliyiinta Unicef oo aan kala hadalnay qalabeynta cusbitalka iyo sidii loo keeni lahaa dhaqaatiir ka howl gasha, waxaanu sidoo kale la hadalnay masuul ka tirsan WHO oo lagu magacaabo Dr Ibraahim, isagana waxa uu noo ballan qaaday dhaqaatiir, qalab iyo dawooyin in uu soo dirayo”.

Ku simaha ra’iisal wasaaraha waxa uu intaa ku daray in kulankooda ay ku magacaabeen 7 wasaaradood oo sida ugu dhaqsida badan wax uga qabta cusbitalka guud ee magaalada Baydhabo. Wasaaradaha howlaha guud iyo guryeynta, dib u dhiska iyo dib u dejinta iyo hantida qaranka iyo qalabeynta ayaa loo xil saaray dayic tirka cusbitalka, halka wasaaradaha caafimaadka, arrimaha bulshada iyo xuquuqul insaanka, waxbarashada iyo shaqada iyo shaqaalaha loo xil saaray in ay baadi goob u galaan sidii hay’adaha QM hoos taga sida WHO iyo Unicef iyo waliba hay’adaha dowliga aan ahayn ay gacan uga gaysan lahaayeen qarashaadka ku baxaya dib u howl gelinta cusbitalka guud ee magaalada oo ah cusbitalka qura ee ku yaalla magaalada Baydhabo.

Marka laga soo tago qodobka ugu muhiimsan oo ay ka doodeen golaha wasiirada waxaa kale oo jiray qodobo kale oo ay isku soo qaadeen golaha wasiirada oo ay kamid ahaayeen warbixino laga dhagaystay wasiiru dowlaha wasaarada dib u heshiisiinta iyo jaaliyadaha oo dhawaan kasoo laabtay socdaal uu kusoo maray deegaano hoos taga goballada Gedo, Bakool iyo jubada dhexe iyo waliba qoraalkii horay ay usoo gudbiyeen qaar kamid ah wasaaradaha, kaasoo ka tarjumayay qaabka ay howlahooda u gudanayaan oo markii hore ku qornaa afka Englishka,ayadoo maanta laysku raacay in wasiirka xuquuqul insaanka Xuseen Ceelaabe Faahiye uu soo diyaariyo oo uu kasoo dhigo af Soomaali. Kulanka maanta ayaa kusoo beegmay xilli baahida loo qabo howl gelinta cusbitalka guud ee magaalada laga dareemayo guud ahaan gobolka Bay oo ay kasoo cusboonaadeen xiisado hor leh iyo falal ammaan darro oo sababay dhimasho iyo dhaawac.

Maxamed Cadde.
RSTV NEWSROOM
Xafiiska RSTV Muqdisho.