RSTV NEWS.Cali Khaliif Galayr oo ku tilmaamay dagaaladii Muqdisho ka dhacay ee dhex maray isbahaysiga la dagaalanka argagixisada iyo maxkamada islaamiga ah dagaalo beeleed.

Cali Khaliif Galayr oo ku tilmaamay dagaaladii Muqdisho ka dhacay ee dhex maray isbahaysiga la dagaalanka argagixisada iyo maxkamada islaamiga ah dagaalo beeleed.

Ra’isalwasaarihii hore ee xukuumadii lagu soo dhisay tuulada Carta ee wadanka Jabuuti Cali Khaliif Galeyr oo xalay u waramayey mid ka mid ah idaacadaha madaxa banaan ee magaalada Muqdisho ayaa gaashaanka u daruuray in dagaaladii ka dhacay magaalada Muqdisho ay yihiin kuwa dhex maray maxaakiim islaami ah iyo gaalo dibo dhilif u ah laakiin waxa uu sheegay in dagaalkaasi uu ahaa dagaal beeleed inkastoo hogaamiyaal isbiirsaday ay faraha kula jireen.

“Aniga uma arko dagaalkii Muqdisho ka dhacay mid mabda’ iyo diin ku salaysan laakiin waxaan u arkaa dagaal beeleed dhex maray qabaa’ilka Muqdisho ku xooggan oo haatan doorbaday in ay isku laabtaan oo ay diriraan” ayuu yiri Cali Khaliif Galeyr oo intaasi ku daray “ Inkastoo hogaamiyaal kooxeedyo ay meel isu urursadeen isla markaana ay samaysteen isbahaysi hadana lama oran karo dagaalku waxa uu ahaa mid dhex maray maxaakiim islaami ah iyo kooxo gaal raac ah.

Dhinaca kale Cali Khalif Galeyr ayaa ka hadlay xiisadaha kasoo kordhay magaalada Baydhabo waxaana uu sheegay in madaxweynaha dowlada kmg ah ee Soomaaliya loo baahnaa marka xiisadahani aydhaceen in durba uu kulan la qaato odayaasha dhaqanka beelaha Digil iyo Mirifle isla markaana uu hoos u dhigo dhaqdhaqaaqa ciidamadiisa ay ka wadaan magaalada Baydhabo iyo deegaanada la xiriira.

Ra’isulwasaarihii hore ee Soomaaliya Cali Kha;iif Galeyr ayaa sheegay in haddii arintu ay sidan kusii socoto madaxweynuhuna uusan xakamayn ay keeni karto in ay isku dhacaan saraakiisha ururka RRA-da oo qaarkood haatanba madaxweynaha ku kacsan laakiin dhowranaya danaha ay leeyihiin isagoo ugu madaxweynaha dowlada kmg ah ee Soomaaliya uu arinta si toos ah u faro geliyo isla markaana maleeshiyaadka uu dhaqdhaqaaqooda hakiyo inta xiisada ay ka degayso.

Hadalka Cali Khaliif Galeyr ayaa kusoo beegmaya xili ay degtay xiisadii ka dhex taagnayd isbahaysiga islaam la dirirka iyo maxkamada islaamiga ah ee gobolka Banaadir waxaana hadalka Cali Khaliif Galayr uu ka hor imanayaa hadalo mas’uuliyiin Soomaali ah ay horey u jeediyeen oo dagaalka ka dhigayey mid u dhaxeeya maxkamada islaamiga ah iyo kooxo reer galbeedka kula soo heshiiyey in culimada ay usoo dhaafiyaan.

Maxamed Cadde.
Xafiiska Muqdisho.