RSTV NEWS.Kooxo burcad ah oo doon ganacsi ku afduubtay xeebaha Muqdisho.

Kooxo burcad ah oo doon ganacsi ku afduubtay xeebaha Muqdisho.

Koox bad jiif Soomaali ah ayaa lagu waramayaa in xalay fiidkii ay duleedka dekeda Ceelmacaan ee magaalada Muqdisho ay ka afduubteen dooni raashiin siday oo u kireysnayd ganacsato Soomaali ah . Doonidan la afduubtay oo siday bariis aad u fara badan ayaa waxa ay kasoo shiraacatay wadanka Indiya oo laga lahaa waxaana ay kusoo jeeday dekeda Ceelmacaan ee duleedka magaalada Muqdisho.

Kooxahan burcad badeeda ah ayaa doonida ula dhaqaaqay jiho aan la garanaynin laakiin warar soo baxaya ayaa sheegaya in doonida loola dhaqaaqay degmada Xarardheere oo ah halka ay ay kasoo shidaal qaataan burcadda. Ganacsadaha doonidan soo kireystay oo lagu magacaabo Cabdi Dheere ayaa sheegay inuusan garanayn waxyaabaha ku riixay bad jiiftan in ay qafaashaan dooni shacabka Soomaaliyeed u sida raashin maadaama horey ay u sheegi jireen in ay beegsanayaan maraakiibta sida sharci darada ah uga kaluumaysanaya xeebaha Soomaaliya.

Ganacsade Cabdi Dheere ayaa ugu baaqay dablayda qafaalatay doontan in ay sii daayaan ayagoo eegaya danta shacabka Soomaaliyeed isagoo dhinaca kalena ugu baaqay wax garadka Soomaalida in u istaagaan sidii doonidaasi loo sii deyn lahaa. Si kastaba ha ahaatee afduubka doonidan ayaa cabsi ku beeraya maraakiibta ganacsi ee agabka iyo raashinka keena dekeda Ceelmacaan ee magaalada Muqdisho waxaana tani ay ugu danbeyn keeneysa sare u kac ku yimaada maciishada.

Maxamed Cadde.
Xafiiska Muqdisho.