Dagaalkan oo u dhaxeeyay maleeshiyooyin deegaanka ah iyo kuwo kale oo taabacsan Cabdi Nuurre Siyaad (Cabdi Waal) oo xubin ka ah isbaheysiga la dagaalanka argagixisada ayaa la isku adeegsanayaa hubka fudud noocyadiisa kale duwan.

Israsaaseyntaan oo ka socota agagaarka Dugsiga hoose dhexe ee Xaawo Taako ayaa salka ku heyso sida la sheegay muran ka yimid Fariisin halkaasi ay ka sameysteen Maleeshiyooyin daacad u ah Cabdi Nuurre Siyaad Cabdi Waal, iyo kuwo deegaanka oo aan ogoleyn Fariisin in halkaasi ay ka sameystaan Isbaheysiga la baxay la dagaalanka argagixisada.

Ilaa iyo hadda Dhaawaca ayaa gaaraya hal qof oo ay xabaddu ka haleeshay madaxa kaasi oo loola cararay Mid kamid ah Isbitaalada Magaalada Muqdisho kuyaalla.

Majirto ilaa iyo iminka cid ka hadashay dagaalada Xamar weyne kasoo cusboonaaday in kastoo abaabulka dagaal uu weli kor u sii socda oo iminka la keensaday hubka noocyadiisa ugu waaweyn.

Dhinaca kale gddoomiyaha degmada Xamarweyne C/llaahi Ibraahim Sahal (Gardhuub)ayaa ku eedeeyay Cabdi Waal in uu weerar ku soo qaaday degmada, xilli waxgaradka iyo odayaasha degmada ay ku hawlanaayeen sidii waan waan iyo is afgarad loogu dhameyn lahaa xiisadaha ka dhex aloosan maleeshiyaadka isbahaysiga iyo dhalinyaro xaafadeedka madinaga ah ee degmada.

Guddoomiyaha ayaa intaa ku daray in ay ergo u direen maleeshiyaadka Cabdi Waal, balse ay ku gacan seyreen baaq nabadeed oo ay u jeediyeen oo ah in ay joojiyaan dagaalka, isla markaana wadahadal lagu dhameeyo khilaafka soo kala dhex galay ayaga iyo dadka ku dhaqan degmada.

"Cabdi Waal ayaa masuul ka ah dagaalada ka socda degmada Xamarweyne, waxa ayna rasaaseeyeen ergo nabadeed oo loo diray si ay xal uga gaaraan xasaradaha ka taagan degmada" ayuu yiri Gardhuub oo intaa ku daray in dhankooda ay ka difaacanayaan deegaankooda maleeshiyaadka isbahaysiga oo xasilooni darro ka abuuraya degmada Xamarweyne.

Waxgaradka ku dhaqan degmada oo ayagana qoraal cabasho ah kasoo saaray dagaalka saakay ka bilowday degmada ayaa ugu baaqay labada dhinac in ay joojiyaan dagaalada ka socda degmada, ayagoo ku eedeeyay maleeshiyaadka isbahaysiga in ay doonayaan in ay xoog ku qabsadaan degmada, waxa ayna waxgaradkaasi caddeeyeen in ay ka go'antahay difaaca degmada.

Dagaalkii maanta ka dhacay degmada Xamarweyne ee magaalada Muqdisho ayaa lagaga adkaaday Maleeshaiyaadkii taabacsanaa Cabdi Waal oo laga saaray gurigii ay soo dageen, ayadoo maleeshiyaadkiisana ay dabada la galeen kuwa Bashiir Raage oo ku sugan agagaarka Masjidka Arbaco Rukun.

Dagaalkaasi ayaa xoogeystay markii maleeshiyaadka isbahaysiga Bashiir Raage ay soo galeen, waxa ayna ciidamada madaniga ee degmada Xamarweyne ay muujiyeen karti dheeraad ah, ayagoo si weyn isaga caabiyay kuwa isbahasyiga oo isu soo baheestay sidii ay gacanta ugu dhigi lahaayeen degmada Xamarweyne.

Inkastoo aan laga war qabin tirada rasmiga ah ee ku geeriyootay dagaalkii maanta, balse warbixino laga soo uruuriyay jiida hore ee dagaalka iyo xarumaha caafimaadka ee Muqdisho ayaa tilmaamaya in tirada dhimashada ay gaarayso 6 ruux iyo dhaawac soo gaaray 3 qof oo kale, ayadoo inta badan dadka wax ku noqday dagaalkaasi ay ahaayeen dad rayid ah.

Dagaalkan oo saakay ka bilowday degmada Xamar Weyne ayaa gabi ahaanba hakad geliyay dhaq dhaqaaqii ganacsi ee ka jiray suuqa Xamarweyne, ayadoo dagaalkaasi uu sababay barakac soo wajahay dadka rayidka ah ee ku dhaqan degmada.

Maxamed Cadde.
Xafiiska Muqdisho.
RSTV NEWSROOM

© RSTV 2006. All Rights Reserved