Ciidankan fariisin ka dhigtay dugsigii hore ee Godey, halkaasoo xarun ciidan u ahaan jirtay Cali Mahdi Maxamed oo madaxweyne ka ahaa dawladdii kmg ahayd ee lagu soo dhisay Jabuuti markii xukanka laga tuuray Siyaad Barre ayaa la sheegay in ay ogalaasho ka heleen waxgaradka dadka ku dhaqan xaafadaas oo aqbalay in bar ciidan ay ka sameystaan halkaasi oo ah goob istaraatiiji ah marka la eego colaadaha ka dhex aloosan maxaakimta islaamiga iyo isbahaysiga sharta iyo sheydaanka.

Ciidamo daacad u ah ganacsade Xaaji Abuukar Cumar Caddaan oo dhawaan ka guul gaaray dagaal ka dhacay duleedka bari ee magaalada Muqdisho, kaasoo dhex maray maleeshiyaad daacad u ah isbahaysiga isku magacaabay argagixiso la dirirka iyo kuwiisa oo taageero ka helaya maxaakimta islaamiga ayaa bar ciidan oo cusub ka sameystay dugsigii hore ee Godey ee degmada Kaaraan ee gobolka Banaadir, taasoo xiisad ka abuurtay degmadaasi oo uu ka taliyo wasiirka ganacsiga Muuse Suudi Yalaxow oo xubin ka ah isbahaysiga.

Maleeshiyaadka wasiirka ganacsiga ayaa soo buuxiyay deegaanka, ayadoo lagu arkayo deegaankaasi gawaarida dagaalka oo la ciir ciiraya maleeshiyaad aad u hubeysan, ayadoo taasi laga yaabo in ay dhaliso iska hor imaadyada hor leh oo ka dhaca deegaankaasi, kaasoo dhex mara isbahaysiga iyo ciidanka ganacsade Xaaji Abuukar.

Dhul ballaarsigan ay sameynayaan maxaakimta islaamiga iyo taageerayaashooda waxa ay qeyb ka tahay istaraatiijiyad lagaga hortagayo isbahaysiga isku magacaabay argagixiso la dirirka oo ayagana ku hawlan dhul ballaarsi la mid kan ay sameynayaan maxaakimta, ayadoo arrintan ay kusoo beegantay xilli dagaallo shalay ay ku dhex mareen degmada Xamarweyne maleeshiyaad daacad u ah Cabdi Waal oo xubin ka ah isbahaysiga iyo ciidanka madaniga degmadaasi oo ku gacan seyray in Isbahaysiga uu fariisan ka sameysto deegaankooda.

Maxamed Cadde.
Xafiiska Muqdisho.
RSTV NEWSROOM

© RSTV 2006. All Rights Reserved