Dibad bax ballaaran oo looga cabanayey amni darida gobolka Hiiraan oo maanta ka dhacay Baladweyn.

Isu soo bax ballaaran oo ay soo agaasimeen ururada bulshada rayidka ah ee ku dhaqan magaalada Baladweyn ee xarunta gobolka Hiiraan, ayna kasoo qeyb galeen maamulka gobolka, odayaasha dhaqanka iyo dadweynaha ku dhaqan magaalada Baydhabo ayaa maanta ka dhacday fagaaraha weyn ee Dalxiiska ee ku yaalla bartamaha magaalada Baladweyn.

Banaan baxan ayaa looga cabanayay falalka ammaan darrada ah ee kasoo cusboonaaday magaalada Baladweyn, kagadaal markii magaaladaasi lagu dilay 2 maalmood ka hor nin musaafir ah, taasoo si weyn ay uga caroodeen dadka ku dhaqan magaalada Baladweyn. Ugaaska beesha Xawaadle Ugaas C/raxmaan Ugaas Khaliif oo ka hadlay banaan baxan ayaa wax laga xumaado ku tilmaamay dilkii loo gaystay ninka musaafirka ahaa halkii laga soo dhaweyn lahaa oo la marti soori lahaa, waxa uuna Ugaaska ku warramay in kooxihii dilkaasi ka danbeeyay ay meel uga dhaceen sumcada dadka ku dhaqan magaalada.

Ugaaska waxa uu codsaday in baaritaano lagu sameeyo kooxda burcada ah ee toogtay musaafirka, isla markaana cadaalada la marsiiyo, isagoo ugu baaqay maamulka gobolka in ay wax ka qabtaan ammaan darrada baahsan kusoo kordhaysa gobolka. Guddoomiye ku xigeenka magaalada Baladweyn Xuseen Cumar Gacamey oo isagana hadal ka jeediyay banaan baxaas ayaa ballan qaaday in maamulkiisa uu tallaabo ka qaadi doona kooxaha caadaystay waxyeelleenta shacabka, isagoo muujiyay sida uu uga xumaaday dilka ninka musaafirka.

Mr Gacamey waxa uu ku booriyay shacabka reer Baladweyn in ay la shaqeeyaan maamulka si laysaga qabto fitna wadayaasha dhibaateynaya dadka rayidka ah iyo musaafiriinta. Dibad baxan maanta ka dhacay magaalada Baladweyn isla markaana nabadgelyada derida looga cabanayey ayaa ah kii ugu horeeyey ee magaaladaasi ka dhaca tan iyo markii halkaasi ay dowlada kmg ah maamul ugu samaysay.

Maxamed Cadde.
Xafiiska Muqdisho.
RSTV NEWSROOM

© RSTV 2006. All Rights Reserved