Maleeshiyaadka loo tababarayo in ay noqdaan ilaalada madaxda ugu sarreysa dowladda kmg ah ee Soomaaliya oo maanta loo qaaday dalka Kenya ayaa gaaray magaalada Nairobi, ayadoo maleeshiyaadkan oo ku raagay garoonka diyaaradaha magaalada Baydhabo ay barqanimadii maanta ka duuleen halkaasi.

Maleeshiyooyinkan gaaray magaalada Nairobi oo tiradooda lagu qiyaasay 110 askari oo uu horkacayay taliyaha booliska Soomaaliyeed Jenaraal Cali Maxamed Xasan Cali Madoobe ayaa waxa ay u baqooli doonaan maalmaha soo socda Magaalada Mombasa, halkaasi oo tababar looga furi doono.

Maleeshiyaadkan maanta la qaaday ayaa waxa ay ka mid yihiin 200 askari oo loogu tala galay in tababaro dhinaca ciidanka ah kusoo qaataan dibada dalka waxaana la filayaa in qeybaha harsan maalinta bari ah ay dhoofaan.

Qarashka ku baxaya maleeshiyaadkan tababarka loo qaaday waxaa bixin doona dalalka deeqaha bixiya oo horay u ballan qaaday in ka kaalmaynayaan dowladda fedaraalka kmg ah ee Soomaaliya tababarka maleeshiyaadka.

Maleeshiyaadkan ayaa waxaa muddo 3 bilood ah ay tababaro kusoo qaadan doonaan xarunta labaad ee wadanka Kenya ee Mombasa ee dhacda xeebta , ayadoo ciidamadanna ay noqonayaan ciidanka 2-aad oo ay dowladdu u dirsato dalka dibadiisa si tababaro ay ugu soo qaataan, ayadoo dowladda ay horay ugu dirtay ciidamo boolis ah dalka Uganda, halkaasi oo tababarro lagu soo siiyay ciidamo boolis Soomaali ah oo gaarayey 65 askari oo u badnaa saraakiishii hore ee booliska Soomaalida.

Maxamed Cadde.
RSTV NEWSROOM
MOGADISHU

© RSTV 2006. All Rights Reserved