QM ayaa waxa ay shaaca qaaday haddii wax laga qaban waayo mashaqada bini aadanimo ee kataagan dalka Soomaaliya in taasi ay horseedayso bur bur ku yimaada dowladda fedaraalka kmg ah ee Soomaaliya.

Xiriiriyaha QM u qaabilsan gargaarka bini aadanimo ee dalka Soomaaliya Chirstian Balslev-Olesen ayaa carabka ku dhuftay in beesha caalamka looga fadhiyo gurmad deg deg ah oo wax looga qabto abaaraha ku dhuftay muddo sanado ah dalka Soomaaliya, hadii kale buu yiri waxaa bur buri doonaa dowladdii ugu horreysay ee loo soo dhisay Soomaaliya muddo 15 sanadood ah.

Ergayga QM waxa uu sheegay 25% Soomaalida in ay ku tiirsan yihiin gargaarka beesha caalamka, waxa uuna yiri haddii aan jawaab deg deg ah laga bixin mashaqooyinka taagan waxa ay noqonaysa dad kor u dhaafaya 10,000 oo ruux in ay geeriyoodaan.

Abaaraha waxa ay salfadeen buu yiri 50% xoolaha la dhaqdo, waxa uuna saadaaliyay in tirada geerida xoolaha ay gaari doonta 80%.

Balsev-Olesen waxa uu xusay inbadan oo ka tirsan deeq bixiyayaasha in aysan daneyneyn in ay lug ku yeesheen arrinta Soomaaliya oo cakiran tan iyo sagaashameeyadii, hayeeshee waxa uu tilmaamay in ay ka faa’iideysteen casharo muhiim ah, waxa uuna yiri shaqaalaha gar gaarka waa kuwa goor hore ka howl galayay dalkaas.

“waxaanu iminka haysanaa fursad, waxaa socda geedi socod nabadeed oo ay wadaan baarlamanka iyo dowladda oo aad u jilicsan, laakin fursadii ugu horreysay muddo 15 sanadood ah dowlad Soomaali ah ay doonayso in ay dalka ku soo rogto nidaamka iyo kala danbeynta, in ay dhisto ciidanka booliska iyo in ay sameysato qorshe ammaan qaran” ayuu yiri Balsiv-Olesen oo intaa raaciyay “fursadaas waxa ay u muuqataa mid sii lumaysa, haddii beesha caalamka aysan qaadin tallaabo horukac leh oo lagu gacan siinayo geedi socodka nabada iyo waliba xaaladaha bini aaadanimo ee ka taagan dalkaas.

haddii aan wax ka qaban weyno howlaha bini aadanimo waxa ay horseedaysa geedi socodka nabada in uu burburo.

Haddii geedi socodka nabada horay loo dhaqaajin waayo waxa ay keenaysaa in howlaha aan ka wadno deegaanada mashaqada ay ka jirto ay soo wajahayso caqabad adag”.

Xiriiriyaha QM u qaabilsan howlaha bini aadanimo dalka Soomaaliya ayaa waxa uu sheegay ku dhawaad 1,000 ka tirsan shaqaalaha gar gaarka in ay ka howl galaan dalka Soomaaliya, ayadoo ay soo wajahaan marxalado aad u adag.

“waxaa si joogto ah noo soo wajaho hanjabaad, burcad badeed, afduub iyo isbaaro” ayuu yiri Balslev-Olesen oo intaa raaciyay “dadka qaar waxa ay sheegaan in ka howl gelinta Soomaaliya ay tahay halka aduunka ugu khatarta badan”.

Xiriiriyaha QM ayaa waxaa lagu wadaa socdaal in uu ku tago magaalooyinka ugu muhiimsan dalka Soomaaliya ka hor inta uusan si rasmi ah u codsan lacag kor u dhaafaysa $325 milyan oo doollarka Mareykanka ah maalinta jimcaha ah.

Maxamed Cadde.
RSTV NEWSROOM
MOGADISHU

© RSTV 2006. All Rights Reserved