Wasiirka koowaad ee xukuumada kmg ah ee Soomaaliya Cali Maxamed Geeddi ayaa markii ugu horreysay waxa uu kulan la yeeshay wafdigii ka socday Beesha Ceyr oo dhawaanahan ku sugnaa magaalada Nairobi.

Masuuliyiinta kulankaas ka qeyb gashay ee ka tirsanaa wafdiga Beesha Ceyr waxaa kamid ahaa xildhibaan Yuusuf Mire Seeraar, xikldhibaan Xasan Dhimbil Warsame, guddoomiyaha golaha deegaanka gobolka Banaadir Maxamud Cumar Tootow iyo xubno kale.

Wararka laga helayo magaalada Nairobi waxa ay sheegayaan in labada dhinac ay kawada hadleen arrimo dhowr ah oo ay ku jiraan dagaaladii ka dhacay magaalada Muqdisho ee dhex maray maxaakimta islaamiga gobolka Banaadir iyo isbahaysiga la magac baxay argagixiso la dirirka iyo dar dar gelinta maamulka gobolka Banaadir oo dhawaan mar kale golaha deegaanka ay u doorteen Cadde Gaabow oo uu horay ugu soo magacaabay ra’iisal wasaaraha xilkaasi.

Xubnaha wafdiga beesha Ceyr ayaa kala hadlay ra’iisal wasaaraha dhibaatada ka taagan magaalada Muqdsiho oo dagaallo culus ay ku dhex mareen isbahaysiga oo ay ku bahoobeen wasiiro ka tirsan dowladdiisa iyo maxaakimta islaamiga, ayadoo xiisadahaasna weli ay ka jiraan magaalada.

Waxa ay sidoo kale ka wada hadleen hanaanka loo joojin karo taageerada Mareykanka uu u fidiyo isbahaysiga la magac baxay la dagaalanka argagixisada oo colaad hor leh ka hurinaya dalka, ayagoo qiil ka dhiganaya in ay la dagaalamayaan shisheeye danbiyo ka galay Mareykanka oo ku dhaamaaleysanaya gudaha Soomaaliya.

Ra’iisal wasaare Cali Max’ed Geeddi ayaa u xaqiijiyay wafdiga beesha Ceyr in dowladdiisa aysan wax shaqo ah ku lahayn isbahaysigaas oo ay ku bahoobeen wasiiro ka biyo diidadsan geedi socodka nabadda oo ay wado dowladdiisa, waxa uuna tilmaamay in Mareykanka uu kala hadlay in ay ixtiraameen madax banaanida Soomaaliya, isla markaana uu ku war geliyay Mareykanka in arrimaha Soomaaliya ay kala soo xiriiraan dowladda Soomaaliya.

Ra’iisal wasaare Geeddi iyo wafdiga beesha Ceyr ayaa isla gartay in dowladda iyo waxgaradka ku dhaqan magaalada Muqdisho ay iska kaashadaan wax ka qabashada ammaan darrada ka taagan magaalada si looga dhigo magaalada goob ay ku shaqeyn karto dowladda kmg ah ee Soomaaliya oo iminka heehaabaysa magaalada Baydhabo oo qudheeda dhibaato dhinaca ammaanka ay ka jiraan.

kulanka dhex maray ra’iisal wasaare Cali Max’ed Geeddi iyo wafdiga beesha Ceyr ayaa qeyb ka ah dadaallo wafdiga beeshaas ay ku doonayaan in ay ku yareeyaan saameynta isbahaysiga la magac baxay la dagaalanka argagixisada uu ku yeelan karo guud ahaan dadka kudhaqan magaalada Muqdisho gaar ahaan beeshaas oo ku eedeeysay isbahaysigaas in uu lacago kaga soo qaato Mareykanka si uu ugu fushado falal si gaar ah loogu gumaadayo beeshooda.

Maxamed Cadde.
RSTV NEWSROOM

Xafiiska RSTV ee Muqdisho.