Wafdi uu hoogaaminayo Ra’isalwasaare kuxigeenka Arimaha Siyaasada ahna Wasiirka Arimaha Gudaha Eng:Xuseen Maxamed Caydiid ayaa booqasho gaaban ku tagay dalal kamida dunida Carabta. Wafdigan oo ay ku wahelinayeen Wasiir Kuxigeenka Wasaarada Amniga qaranka mudane Cabdiirashiid Maxamed Xidig iyo Taliyaha Ciidanka Xooga Dalka Soomaaliyeed Gan: Ismaaciil Qaasim Naaji.Ayaa soo gaadhay wadanka Yaman.

Halkaas oo loogu soodhaweeyay si heer sare ah, Wasiirka Arimaha Gudaha mudane Xuseen Maxamed Faarax Caydiid iyo wafdigiisu waxay la kulmeen Madaxwayne ku xigeenka wadanka Yaman iyo masuuliyiin sar sare oo katirsan dawlada dalka Yaman.Talifishinka RSTV oo kula xiriiray qadka taleefoonka Wasiirka Arimaha Gudaha  Xuseen Caydiid ayaa waxa uu u xaqiijiyay in safarkooda hadafkiisu ahaa sidii shacbiga reer Yaman ugu hanbalyeen lahaayeen isku darsigoodii  iyo in ay masuuliyiinta wadanka u sharxaan qorshaha ay DFKS dib ugu guurayso dalka Soomaaliya gudihiisa .

waxa kale oo uu wasiirku RSTV u sheegay in hawshoodii guul ugu dhamaatay, isla markaana ay dawlada Yaman qayb lama huraana ka qaadanayso dib u rarida DFKS iyo waxkasta oo hirgalinaya badbaadinta iyo soocelita sharafta shacbiga Soomaaliyeed. Isla markaana waxa uu wasiirku daaha kaqaaday in dawladu did u noqonayso xiligii uu cayimay Raysalwasaare Geedi oo ku beegan 31 bishan May.

Waxa kale oo uu mudane Caydiid ugu baaqay shacbiga Soomaaliyeed meelkasta oo ay joogaan in ay qaybtooda ka qaataan hirgalita DFKS si ay u soo ceshtaan sharaftay ku lahaayeen caalamka. Waxaanu ku nuuxnuuxsaday in dawladan shacbiga la’aantiis aanay horumar dhab ah gaariri karin. Sidoo kalena aanay daneen danaha gaarka ah, ee loo midoobo danta guud ee qaranku u baahan yahay si looga baxo dhibka umada saameeyay 15kii sano ee ina soo dhaafay.

By Abdifataah Maxamed Abdinur

RSTV Minnisota