Munaasabad lagu xusayo sanad guuradii 1aad ee ka soo wareegtay markii loo doortay Madaxweyne C/laahi Yuusuf iyo caleemasaarkiisii ayaa maanta lagu qabtay xarunta Villa Somaliya ee magaalada Muqdisho.

Munaasabadan oo ay ka soo qeybgaleen Ra’isulwasaare K/xigeenka ahna wasiirka arimaha gudaha, Gudoomiyaha gobolka Banadir ahna duqa magaalada Muqdisho, Gudoomiye K/xigeenka gobolka Banadir dhinaca arimaha siyaasadda, Saraakiil Dadweyne kale ayaa waxaa ka hadlay Eng.Xuseen Max’ed Ceydiid oo sheegay in shacabka Soomaaliyeed ay ixtiraamaan mas’uuliyiinta dalkooda ugu sareysa, isla markaana ay qaataan awaamiirta madaxweynaha iyo Ra’isulwasaaraha, isagoo xusay in maalin taariiqi ah ay tahay markii loo dhaariyay Madaxweyne C/laahi Yuusuf Axmed oo maanta ay ku began tahay.

Xuseen Max’ed Ceydiid waxa uu farta ku fiiqay in shacabka Soomaaliyeed ay heleen dowlad si cadaalada ah lagu soo doortay madaxweynaheeda taasoo howlo badan ka qabatay dalka mudada sanadka ah..

Xuseen Ceydiid Waxa uu ugu baaqay shacabka Soomaaliyeed Meel kasta oo ay joogaan in ay is cafiyaan isla markaana ay u guntadaan sidii ay u taageeri lahaayeen dowladda FS oo balan qaaday sida uu sheegay in cadaalad iyo sinaan ay ugu adeegeyso dadka Soomaaliyeed.

Sidoo kale munaasabadda maanta waxaa ka hadlay Gudoomiye gobolka Banadir ahna duqa magaalada Muqdisho Max’ud Xasan Cali Cadde Gaabow oo sheegay in uu ku faraxsan yahay munaasabadaan isla markana tilmaamay in au ka go’an tahay maamulka gobolka Banadir uu si toos ah ula shaqeynayo dowladda FS.
 

Munaasabadaasi ayaa mas’uuliyiintii ka soo qeybgashay waxa ay sheegeen in ay taageersan yihiin dowladda FS isla markaana ay ka go’an tahay in ay la shaqeeyaan, iyagoo dowladda ka codsaday in shacabka Soomaaliyeed ay ugu adeegto si cadaalad ah isla markaana ay buuxiso soo celinta amaanka iyo kala dambeynta

jakuula@hotmail.com