Wasiirka gaashaandhiga xukuumada federaalka kmg ee Somalia oo Gaalkacyo kasoo degay.
wasiirka gaashaandhiga xukuumada kmg ah ee Somalia C/raxman Cali Maxamud iyo wafdi ballaaran uu hogaaminayo ayaa maanta kasoo degey garoonka dayaaradaha ee magaalada Gaalkacyo ee xarunta gobolka Mudug..waxaana wararka magaaladaasi ka imanaya ay sheegayaan in intii badneyd wafdigaasi ay u gudbeen magaalada Garoowe ee caasimad goboleedka Puntland waxaana magaalada ku harey labo xubnood oo kaleya.

 Wafdigan maanta soo gaaray magaalada Gaalkacyo ayaa waxaa si weyn magaalada ugu soo dhaweeyey maamulka gobolka ,ciidamada daraawiishta Puntland iyo dadweyne aad u fara badan.
C/raxman Cali Maxamuud wasiirka gaashaandhiga DFGS ayaa markii uu magaalada soo gaaray waxa uu hambalyo u diray dadka Somalida oo uga hambalyeeyey maalinta 1-da Luulyo.

Wasiirka gaashaandhiga C.raxman Cali waxa uu sheegay inuu wadi tagi doono dhamaan gobolada Puntland oo uu ku jiro gobolka Sanag oo ah gobol uu muran ka taaganyahay oo ay isku heystaan maamulada Somaliland iyo Puntland.

imaanshiyaha wafdigan ee magaalada Gaalkacyo ayaa waxa uu ku soo beegmay xilli ay magaalada Boosaaso ay soo gaareen wafdi ballaaran oo uu horkacayo madaxweynaha DFKS C/llaahi Yuusuf Axmed .magaalada Gaalkacyo xuskii 1-da Luulyo dartii waxa laga qaaday bandowgii saarnaa habeenadii lasoo dhaafay ,lamana yaqaan in bandowgaasi lasoo celinayo iyo inkale.

Maxamed Cumar Sheekh (Maxamed Cadde)
Rochester  Somali Tv  Muqdisho

Cadde_8@hotmail.com