Ra'isulwasaare
K/xigeenka dowladda FS ahna wasiirka arimaha gudaha Xuseen Maxamed
Ceydiid ayaa waxa uu sheegay in mudo 4 maalmood ah lagu qaadayo
isbaarooyinka yaala gudaha magaalada Muqdisho.
Hadalkan ayuu Xuseen Ceydiid wasiirka
arimaha gudaha ahna Ra'isuwlasaare K/xigeenka dowlada FS uu ka sheegay
maanta Hotel Saxafi oo warfidiyeenka kula hadlayay ka dib markii kulan
gaar ah ay qaateen Xuseen Ceydiid, Muuse Suudi, Max'ed Qanyare, Axmed
Ducaale Xaaf oo intoodaba ka wada tirsan labada gole ee dowladda FS iyo
Ganacsade C/rashiid Shire Ilqeyte.
Kulankaasi oo gaar ahaa islamarkaana
albaabada ay u xirnaayeen ayaa ajandaha shirkooda uu Xuseen Ceydiid
sheegay in ay aheyd sidii loo sii ambaqaadi lahaa dhameystirka howlaha
isbaaro qaadista magaalada Muqdisho isla markaana 4ta cesho ee soo
socota dhamaan lagu qaadayo isbaarooyinka yaala gudaha magaalada
Muqdisho iyo waliba labada Ex Ctrl ee soo gasha magaalada Muqdisho.
Xuseen Maxamed Ceydiid ayaa sidoo kale
maanta lagu waday in uu warbixin gaar ah siiyo xubnaha labada gole ee
dowladda FS balse uu baaqday warbixintii uu siin lahaa, iyadoo kulan
gaar ah uu la yeeshey Muuse Suudi, Qanyare, Xaaf iyo ganacsade C/rashiid
Ilqeyt.
Dhinaca kale xubnaha labada gole ee ku
sugan magaalada Muqdisho ayaa kulankoodii caadiga ahaa ku yeeshay Hotel
Saxafi ee magaalada Muqdisho.
Xildhibaan Saleebaan Colaad Rooble ayaa
shabakada warabaahinta shabelle uga waramay kulanka maanta ay yeesheen
Xubnaha labada goble , isagoo sheegay in dib loo dhigay ajandayaasha
kulankaasi oo ku saabsanaa war bixin laga sugayay in laga dhageysto 59
xubnood oo ahaa gudiga abaabulka nabadgalyada gobolka Banadir iyo
warbixin laga doonayo in laga dhageysto wasiirka arimaha gudaha ahna
Ra'isuwlasaare K/xigeenka Xuseen Maxamed Ceydiid.
Saleebaan Colaad Rooble waxa uu sheegay
in maalinta sabtida ah xubnaha labada gole ee Muqdisho ku sugan ay guda
gali doonaan ajandayaashood ku saabsan warbixinta gudiga nabadgalyada
gobolka Banadir iyo warbixinta laga doonayo in laga dhageysto wasiirka
arimaha Gudaha Xuseen Max'ed Ceydiid.
Shir
Jaraa’id oo ay wada jir u qabteen gudoomiyii hore gobolka Banadir C/laahi
Ganey Firinbi iyo duqiihore ee Muqdisho Ibraahim Cumar Sabriye Shaaweey
ayaamaanta waxa ay ku eedeeyeen madaxweynaha dowladda FS C/laahi Yuusuf
Axmed, Ra'isulwasaare Geedi iyo Wasiirka arimha gudaha ahna
Ra'isulwasaare K/xigeenka Xuseen Maxamed Ceydiid in ay ka wadi la'yihiin
howlihii dhinaca nabadgalayada ee gobolka Banadir.
Shirka Jaraa'id ayay si wada jir ah uga
sheegeen Mudane Firinbi iyo Mudane Shaaweey in ay iyagu yihiin
mas'uuliyiinta sharci ahaan gobolka Banadir iyo kan dowladaha hoose
maamulaya.
C/laahi Xasan ganey Firinbi ayaa waxa uu
sheegay in 16 ka degmo gudoomiyeyaashoodii gobolka Banadir haatan uu soo
foodsaaray jahawareer la xiriira cida ay Gudoomiyaha gobolka Banadir u
aqoonsan yihiin iyagoo kala aada xarumaha gobolka Banadir iyo Hotel
Ramadan.
Waxa uu sheegay in taasi ay ka timid
carqalad uu sheegay in ay sabab u yihiin Mas'uuliyiinta dowlada ka mid
ah oo uu ku jiro Ra'isulwasaare K/xigeenka Xuseen Maxamed Ceydiid iyo
Ra'isulwasaare Geedi.
duqii hore ee magaalada Muqdisho
Ibraahim Sabriye Shaaweey ayaa isagu ku dheeraaday siyaabaha arimahan
loo xalin karo in ay ku jirto in dib loogu laabto sharuucdii dalka Kenya
ay mar hore xubnaha labada gole ku dagsadeen, waxa uuna sheegay in
sharci ahaanshaha mas'uuliyiinta gobolka Banadir loo magacaabay uu yahay
mid qalad ah habkii uu u maamulay Ra'isulwasaare Geedi.
Ibraahim Shaaweey waxa uu sheegay in
carqaladaha iminka soo food saaray howlihii dowladaha hoose ay ku jirto
mid ay abuureen mas'uuliyiin uu ugu horeeyo sida uu yiri madaxweyne C/laahi
Yuusuf.
Waxa ay tilmaameen labada mas'uul in ay
jirto dhibaatooyin la doonayo in laga abuuro gobolka Banadir oo la
xiriirta iska horkeenka dadka magaalada Muqdisho.
Shirkan Jaraa'id oo labada mas'uul ay
wada jirka u qabteen ayaa waxaa lagu soo bandhigay decumenti xubno 29
xildhibaan oo ka tirsan labada gole ee dowladu ay horey ugu ogolaadeen
Md, Firinbi iyo Shaaweey in ay ay sii wadaan howlaha gobolka Banadir iyo
dowladaha hoose, kuwaasi oo xubnaha saxiixay uu ku jiro k/xigenka
Ra'isulwasaaraha dowladda FS ahna wasiirka arimaha gudaha Xuseen Maxamed
Ceydiid.
Md, Shaaweey iyo Firinbi Shirkooda
Jaraa'id ay maanta qabteen ayaa waxaa goobjoog ahaa G/sare Cabdi Xasan
Cawaale Qeybdiid oo taliyaha booliska Soomaaliya dhawaan uu u magacaabay
wasiirka amniga Qaranka Maxamed Qanyare Afrax.
------------------------------------------------------------------------------
Qaar
ka mid ah xildhibaanada Baarlamanka garabka magaalada Muqdisho ayaa waxa
ay sheegeen in IGAD ay ku guuldareysatay arimaha Somaliya iyo xalinta
khilafka u dhaxeeya labada garab ee dowladda FS, waxa ayna sheegeen in
ay soo dhaweynayaan kan haatan Jaamacadda Carabta bilaabeyso.
Xildhibaan Caamir Axmed Max'ed (Caamir
shakeeti) oo u waramayay saxaafada ayaa waxa uu sheegay in IGAD ay la
heyd gogosha dib u heshiisiinta Soomaaliya balse ay ku guuldareysatay
isu keenida labada garab ee dowladda FS ee kala sugan magaalooyinka
Jowhar iyo Muqdisho si loo dhameeyo khilaafka xagga fikirka ah ee u
dhaxeeya.
Xildhibaan shakeeti waxa uu ugu baaqay
mudanayaasha Baarlamanka FS in ay qeyb ka qaataan dadaalada nabadda ee
haatan ay wado Jaamacadda Carabta, isla markaana ay tahay in loo muujiyo
niyad wanaag.
Waxa uu intaasi uu raaciyay in Somaliya
ay leedahay dowlad Federaal ah islamarkaana ay tahay in aan la wiiqin,
isagoo dhinaca kale ugu baaqay beesha caalamka in ay taageeraan
dadaalada cusub oo ay wado jaamacadda carabta, waxa uuna xusay in ay
tahay xiligii dowladda FS ay ka heshiin laheyd gudaheeda walow haatan
aysan jirin buu yiri fikrado waaweyn oo la isaga soo horjeedo.
------------------------------------------------------------------------------
Ciidamamada amaanka Yemen ayaa
soo qabqabtay ilaa iyo 200 ruux oo Tahriibayaal Soomaali ah oo la
shaaciyay in si sharci daro ah ay ku soo galeen dalkaasi muddooyinkii
ugu dambeeyay .
Ciidamada Yemen ayaa dadkani Soomaalida
ah ka soo kala qabtay Magaalada Sanca iyo Gobolada Xadarmuut ,Shabuuh
iyo Al-daalic.
Dadkani ayaa qaarkood la soo qabtay
dabayaaqadii todobaadkii hore sida ay sheegeen saraakiisha amaanka Yemen
waxaa dadkani ka mid ah 30 ruux oo isugu jira dumar iyo caruur.
109 ruux oo ka mid ah Tahriibayaasha
Soomaalida ayaa laga soo qabtay Gobolka Al-daalic .
horey ayaa qusulka Soomaalida ee Yemen
Xuseen Xaaji ayaa ka digay in Soomaalidu ay ku soo dhiirato xilligan oo
baddu ay degan tahay ,doomaha safarkana uu bilaabmay ,isagoo sheegay in
ay jirto dhibaatooyin nka soo horeeya dadka Tahriibka ku tagaya dalka
Yemen .
xeebaha dalka Yemen ayaa lagu arkaa
Todobaadkiiba ugu yaraan sadax doomood oo sida Soomaali iyo Ethopian
Tahriibayaal oo doonaya in ay uga sii gudbaan dalka Sacuudiga ,iyadoo
UNHCR ay albaabada u laabtay xeryihii qaxootiga Soomaalida ay ku
lahaayeen dalka Yemen ayey adagtahay Soomaalida Yemen Tahriibka ku
tageysa in loo arko dad qaxooti ah
muxyadiin cali jicaalle jakuula
Muqdisho,Somalia
