Wafdi ka socda midowga Yurub oo maanta soo gaaray magaalada Jowhar ayaa kulan la yeeshay Ra’isulwasaaraha dowladda FS Prof. Cali Max’ed Geedi, iyagoo kala hadlay arimo dhowr ah.

Wafdigaan uu hogaaminayay Danjiraha midowga Yurub u jooga magaalada Nairobi ee qaabilsan arimaha Somaliya Richard Hands ayaa waxa ay ka wada hadleen labada dhinac sii xoojinta xiriirka u dhaxeeya midowga Yurub iyo Somaliya, iyadoo si gaar ah wafdiga uu uga tacsiyeeyay umadda Soomaaliyeed iyo dowladda FS weerarkii dhowaan ka dhacay magaalada Muqdisho ee lagu qaaday Kolonyo galbineysay Ra’isulwasaaraha dowladda FS

Sidoo kale kulankaasi ayaa waxaa looga hadlay booqashada uu Ra’isuwasaare Geedi ku tagayo xarunta midowga Yurub ee ku taala magaalada Brussels ee dalka Belgium ka.

Kulankaan ayaa waxaa goob joog ka ahaa Ra’isulwasaare K/xigeenka ahna wasiirka maaliyadda dowladda FS Saalim Caliyow Ibrow, Wasiirka arimaha dibada C/laahi Sheekh Ismaciil iyo wasiirka qorsheynta iyo xiriirka Caalamiga C/risaaq Jurille iyo waliid Muuse oo ah u qeybsanaha xafiiska arimaha siyaasadda Midowga Yurub uu ku leeyahay magaalada Nairobi.

Sidoo kale Wafdigaan Midowga Yurub ayaa waxa ay la kulmeen Madaxweynaha dowladda FS C/laahi Yusuuf Axmed, iyagoo u cadeeyay in waxii ka dambeeya hadda aysan aqoonsaneyn in uu jiro khilaaf macno leh oo u dhaxeeya dowladda FS.

Wafdigaan ayaa waxa ay u mahadceliyeen dowladda FS sidii diiraneyd ee ay ugu soo dhaweeyeen magaalada Jowhar, waana markii ugu horeeysay oo wafdigaan uu soo gaaro halkaasi tan iyo markii dowladda FS ay soo dagtay magaalada Jowhar ee xarunta gobolka Sh/dhexe.

Muxyadiin Cali jimcaalle

jakuula@hotmail.com

Muqdisho Somaliya