Wasiirka ganacsiga dowladda FS ayaa wax laga xumaado ku tilmaamay falka ay dowladda Sweden xariga ay u geysatay Cabdi Qeybdiid in uu yahay mid qalad ah islamarkaana ah afduub lagula kacay mas’uul Soomaaliyeed ka dib khudbad uu ka jeediyay maanta isu soo bax balaaran oo ka dhan ah dowladda Sweden oo ka dhacay fagaaraha Tarabuunka ee magaalada Muqdisho.

Muuse Suudi yalaxow oo ka mid ah wasiirada dowladda FS ee ku sugan magaalada Muqdisho iyo mas’uuliyiin kale oo ka tirsan labada gole ee dowladda FS oo maanta ka qeybgalay banaabax ka dhan ah dowladda Sweden ayaa waxa uu ku tilmaamay xariga dowladda Sweden ay u geysatay cabdi Qeybdiid in uu ahaa mid aan sharciga waafaqsaneyn isla markaana wax u dhimaya siyaasadda dowladda Sweden ee ku wajahan arimaha Somaliya.

Waxaa kaloo uu sheegay xiritaanka Cabdi Qeybdiid in uu yahay mid afduub ah oo lagu la kacay Mas’uul Soomaaliyeed oo howlo shaqo kaga ambabaxay magaalada Muqdisho isla markana gaaray wadanka Sweden, isagoo sheegay in ay iska cadahay cidii ka dambeysay xariga Cabdi Qeybdiid ayna yihiin dad qaldan oo damacoodu fogaaday.

Wasiirka ganacsiga dowladda FS ayaa Sheegay in xariga loo geystay Cabdi qeybdiid uu la mid yahay Taliyaha ciidamada Booliska Sweden oo afduub loogu qabsado wadanka Somaliya isla markaana ay dowlada Sweden ay kala saarto waxa ay xaq u leedahay iyo waxa aysan xaq u laheyn, isagoo tilmaamay in wax loo sheego oo kaliya aysan ku dhaqaaqin.

Muusa Suudi yalaxow ayaa ugu baaqay shacabka Soomaaliyeed in aan loo waxyeleyn xariga Cabdi qeybdiid cid kale, isagoo sidoo kale ugu baaqay dowladda Sweden in ay si deg deg ah u soo deyso isla markaana magdhow ay ka bixiso xariga ay kula kacday taliyaha ciidamada Booliska Soomaaliyeed..

Muxyadiin Cali jimcaalle jakuula

jakuula@hotmail.com

Muqdisho Somaliya