Magaalooyin badan oo ka tirsan wadanka Somaliya ayaa saakay si aan khilaaf laheyn looga ciiiday, iyadoo dabaaldagyo kala duwan oo lagu maamuusayo maalinta ciida ay ka dhaceen magaalooyinkaasi.

Magaalada Muqdisho ayaa saakay si weyn looga ciiday, iyadoo wadooyinka lagu arkayay dad fara badan oo munaasibadda ciida saakay u soo baxay.

Dad weyne raxan raxan u socoda oo isugu jira caruur dadwaaweyn oo rag iyo dumar leh oo aad u labisan ayaa saakay lagu arkayay wadooyinka waaweyn ee magaalada Muqdisho, kuwaasi oo isugu hambalyeynaya munaasabadda ciida Soonfur, iyadoo Takbiirta salaada Ciida saakay laga maqlayay dhamaan masaajidyada magaalada Muqdisho.

Caruur sidata qalab kala duwan iyo dhar aad u qurxoon ayaa soo galay wadooyinka, qaarkoodna saarnaa gaadiidka Blka ee ka shaqeeya degmooyinka kala duwan magaalada Muqdisho.

Dhinaca kale waxaa jira caruur fara badan oo aan ka qeyb qaadan munaasabadda Ciida, iyadoo caruurtaasi ay y badan yihiin kuwa ku jira xerayaha qaxootiga, kuaasi oo aan heysan dhaqaale ku filan oo ay ku ciidaan.

Degmada Baardheere ee gobolka Gedo ayaa sanado ka dib markii ugu hoereeysay saakay si wada jir ah looga ciidayaa, iyadoo wax khilaaf ah aanu jirin,

Kumanaan ka mid ah dadweynaha ku nool degmada Baardheere ayaa subaxnimadii hore ee saakay u dareeray dukashada salaada ciida barekeysan ee Ciidul Fidriga.

Dadweynahaasi oo isugu jirey rag, Dumar iyo Caruur ayaa waxa waxa ay isugu soo baxeen garoonka kubada cagta degmada Baardheere iyo masaajidyada waaweyn ee magaalada halkaasi oo ay ku dukadeen salaadii ciida.

Dhinaca kale Magaalada Baydhabo ee xarunta gobolka Baay ayaa si weyn looga ciiday, iyadoo wax khilaaf ah aanu jirin.

Barxadda weyn ee iskuula Buluusiya ee magaalada Baydhabo ayaa saakay salaadii ciida waxaa ku dukaday boqolaal dad ah oo dadka reer Baydhabo ah, iyadoo dadkii isugu yimid halkaasi laga dareemayay farxado ku aadan munaasibadda Ciida Soon fur.

Magaalada Baydhabo qeybaheeda kala duwan ayaa lagu arkayay Dadweyne aad u fara badan oo isugu jira Dumar, Caruur iyo dhalinyaro, kuwaasi oo watay labiska nuucyadiisa kala duwan.

muxyadiin cali jimcaalle jakuula

jakuula@hotmail.com

muqdisho somaliya