Wafdiga Dhalxa ayaa ka qeyb galey shirka barlamanka Carabta

Waxaa shaley magaalada Qaahira ka furmay Shirka Baarlamaanka Jaamacada Carabta. Shirka waxaa furay Madaxweynaha dalka Masar Xusni Mubarak.

wafdiyo kala duwan oo ay kala hogaaminayaan Guddoomiyaha Baarlamaanka Shariif Xassan iyo Kuxigeenkiisa Prof.Maxamed Cumar Dalxa ayaa waxaa loo ogolaadey inay si rasmi ah shirkan uga qeyb galaan dhamaan wafdigii la socday Prof.Dalxa ee ka yimid magaalada Jowhar.

Labadan wafdi ee ka socday dalka Soomaliya ayaa mid waliba sheeganayaa in ay sitaan casumaada Baarlamaanka Soomaaliya uga qeyb galaya Shirka maanta ka furmay Qaahira ee Baarlamaanka Jaamacada Carabta.

Wafdigii la socday Shariif Xassan Shiikh, Guddoomiyaha Baarlamaanka oo ay ku wehliyeen 3 xildhibaan ayaa waxaa loo ogolaaday in shirka uu ka qeyb galo Shariif Xassan oo kaliya.

Xildhibaanadii kale ee la socday Shariif Xassan wafdigiisa ayaa loo sheegay in xubnaha Baarlamaanka uga qeyb galaya ay yihiin Wafdiga ka yimid magaalada Jowhar oo uu horkacayo G/Kuxigeenka Maxamed Cumar Dalxa iyo Guddoomiyaha Shariif Xassan oo asagan lagu daray shirkaasi.

Dhacdadaas waxaa si weyn uga xumaadey Xildhibaanada garabka Muqdisho oo sheegay in Jaamacada Carabta ay si gaar ah casumaad ugu dirtay xildhibaanada ku sugan magaalada Jowhar.

Xildhibaano ay kamid ahaayeen Yusuf Xassan Ibraahim (Dheeg) iyo Zakariya Xaaji Maxamuud oo kamid ahaa Wafdiga shariif Xassan ayaa si weyn uga carooday kadib markii laga celiyey shirkii maanta ka dhacay Qaahira.

Waxaa la filayaa in shirkan Baarlamaanka Jaamacada Carabta lagu dhisayo Xubnaha kusoo aaday dowlada Soomaaliya ay tahay 4 xildhibaan, ayadoo loo badinayo in ay kuwaasi noqdaan xubnaha ka yimid magaalada Jowhar ee kamid ahaa wafdigii Dalxa. Balse arrintaasi ayaa la sheegay in ay tahay mid weli murran weyn uu ka taagan yahay.