Golaha dhaqanka odayaasha gobolka Hiiraan ayaa si weyn uga horyimid hadal uu sheegay Max'ed Cumar Xabeeb Max'ed Dheere, kaasi oo ahaa in qofkii dambi ku galaa gudaha gobolka Hiiraan lagu soo xirayo gobolka Sh/dhexe gaar ahaan magaalada Jowhar ka dib kulan ay yeesheen odayaashaasi.

Kulankaan oo odayaasha dhaqanka gobolka Hiiraan ay yeeshaan todobaadkiiba mar ayaa waxa ay si weyn ugu cambaareeyeen hadaladii ka soo yeeray Gudoomiyaha gobolka Sh/dhexe Max'ed Dheere, oo dhowaan gaaray degaanka Shaw ee gobolka Hiiraan, isagoo sheegay in uu halkaasi u yimid dhex dhexaadinta labo beelood oo dagaal uu ku dhex maray degaankaasi.

Max'ed Dheere oo hadalo halkaasi ka jeediyay ayaa waxa uu sheegay in cidii dambi ku gasha gudaha gobolka Hiiraan lagu xiri doono magaalada Jowhar ee gobolka Sh/dhexe isla markaana ay ciidamadiisa ay ka soo qaban doonaan meel kasta uu ka joogo gobolka Hiiraan.

Golaha odayaasha dhaqanka gobolka Hiiraan oo ka kooban 63 xubnood ayaa waxa ay ku tilmaameen mid Max'ed Dheere uu ku riyooday waa sida ay hadalka u dhigeene,

Afhayeenka odayaasha dhaqanka gobolka Hiiraan Xasan Dirir ayaa waxa uu sheegay in hadalka uu ku hadlay Max'ed dheere uu yahay mid xasilooni darro ka dhex abuuri kara labada gobol ee Hiiraan iyo Sh/dhexe.

" Ma dhici karto mana dhici doonto in qof laga waday gobolka Hiiraan lagu xiro xabsi ku yaala gobolka Sh/dhexe gaar ahaan magaalada Jowhar ayuu intaasi sii raaciyay Afhayeenka".

Raage Nuur Gaab oo ah nabadoonka ugu da'da weyn golaha dhaqanka gobolka Hiiraan ayaa isaguna sheegay in maamulka iyo nabadgalyada gobolka Hiiraan ay tahay mid u taal reer Hiiraan isla markaana aysan aheyn mid ay iska maamushaan reer Jowhar.

Arintaan ayaa waxa ay noqotey in si toos ah odayaasha dhaqanka gobolka Hiiraan ay uga soo horjeestaan maamulka Yuusuf Dabageed oo ay ku eedeeyeen in uu ku lug leeyahay amuurahaasi, iyadoo maanta hadal heynta ugu badan ee magaalada B/weyne ay aheyd ka hadalka arintaan

Muxudiin Cali Jimcaale Jakuula

Jakuula@hotmail.com