Wasiirka amniga Qaranka Maxamed Qanyre oo maanta warbixin siinayey xubnaha baarlamaanka ee ku sugan magaalada Muqdisho ayaa sheegay in fashil uu ku yimid wadahadaladii beesha caalamka ay ku dhexdhexaadinayeen xubnaha golayaasha dowladda ku kala sugan Jowhar iyo Muqdisho.Wasiirka amniga Qaranka Maxamed Qanyare ayaa sheegay in fashilkaas ay ka dambeeyaan madaxweyne Cabdulaahi Yuusuf iyo Ra’isul wasaare Geeddi

Sida ay sheegeen xubna ka tirsan labada gole hadalkan ayuu wasiirka ammaanka Qaranka Maxamed Qanyare ka sheegay maanta kulankii ay isugu yimaadeen xubnaha labada gole isagoo warbaxin ka siinayey safarkii uu dhawaan ku tagay magaalada Nairobi ee dalka Kenya.

Maxamed Qanyare Afrax waxa uu sheegay in kulankii la rabay in la isugu keeno isaga iyo Ra’isul wasaaraha inuu ku gacan seyray Cali Maxamed Geeddi kulankaas oo ay soo qabanqaabiyeen danjiraha Britain u qaabilsan arrimaha Soomaaliya Devid Bell iyo wasiirka iskaashiga gobolka ee dowladda Kenya.

Wasiirka ammaanka Qaranka Maxamed Qanyare waxa uu ku eedeeyey Ra’isal wasaare Cali Maxamed Geeddi in labada kulan oo aheyd in la isku arko uu ka baaqday.

Sidoo kale Maxamed Qanyare Afrax ayaa intaas ku daray in beesha caalamka uu dhaqaale u diiday dowladda fedraalka kala qeybsanaanta awgeed.

Maxamed Qanyare Afrax oo ka hadlayey ciidamadii dhawaan soo gaaray magaalada jowhar ayaa sheegay in ciidamada dhawaan lagu xareeyey xerada Konga ay dowladda Yaman bixineyso dhaqaalaha ku baxaya sida gaddiidka dagaalka, shidaalka iyo hubka intaba.

Wasiirka amniga Maxamed Qanyrae waxa uu caddeeyey in dowladda Yaman ay faragalin ku heyso arrimaha Soomaaliya isagoo sheegay in hore ay hub u soo siisay garabka magaalada Jowhar ku sugan.

Ka sokow warbixinta wasiirka amniga Maxamed Qanyare uu siiyey xubnaha baarlamaanka ayaa waxaa sidoo kale fadhigii maanta warbaxin lagaga dhageystay guddoomiyaha guddiga maamul u sameynta gobolka Banaadir Xaaji Muuse Suudi oo soo gudbiyey warbixin ku saabsaneyd waxyaabihii u qabsaoomay guddiyada uu madaxda u yahay iyo waxa u harsan.

Wasiiru dowlaha xafiiska Ra’isul wasaaraha C/qaadir Xaaji Maxamuud Dhaqane ayaa markii uu kulankooda soo dhamaaday kaddib faahfaahin ka siiyey Saxaafadda waxyaabihii looga hadlay kulankii maanta.

Fadhigii maanta oo uu shirguddoominayey guddoonka KMG ah xildhibaan Cumar Xaashi Aadan ayaa waxaa ka soo qeybgalin Ra’isul wasaare ku xigeenka ahna wasiirka arrimaha gudaha Xuseen Ceydiid.

MuxudiinCali Jimcaalle Jakuula
Muqdisho Somaliya