Qadkii isgaarsiinta ee gobolada Hiiraan, Sh/dhexe iyo G/gaduud oo hawada ka baxay

 Sida ay sheegayaan Mas`uuliyiinta shirkadaha Telcom, Hormuud, iyo Nationlinka waxaa manta abaarihii 12:00 duhurnimo hawada laga waayay dhamaan isgaarsiintoodii sabab ay ku sheegeen inaanay la soconin sababta ay hawada uga baxeen.

Saraakiishan ayaa sheegay inaysan jirin wax cilad ah oo abuuray inay hawada isaga baxaan, hase ahaatee wararka laga helayo gobolka sh/dhexe ayaa sheegaya in maamulka degmada jowhar uu manta u qeybiyay shirikaadka qoraal amar ah oo muujinaya in shirkadaha isgaarsiinta ee halkaasi inay demiyaan dhamaan adeegooda isgaarsiineed sababo uusan maamulku shaacin, iyadoo arintani ay sidoo kale saameysay gobolada hiiraan iyo G/gaduud ee bartamaha soomaaliya.

Wararka laga helayo deegaanadaasi ayaa tibaaxaya inay jiraan howlgalo lagu sheegay qarsoodi oo ay dowladda Ethiopia ka fulineyso goboladaas, iyadoo sidoo kalana lagu waramayo inay jiraan ciidamo iyo gaadiidka dagaalka oo aan la garaneyn tiradooda oo ku Soo wajahan magaalada jowhar ee gobolka sh/dhexe, halkaasoo uu ku sugan yahay madaxweyanaha soomaaliya C/llaahi Yuusuf Axmad.

Si kastaba ha ahaatee dadka qaar ayaa sheegaya in howlgalada ay dowladda Ethiopia ka fuliso gudaha soomaaliya in lagu yaqaano inay xirto dhamaan edeegyada isgaarsiinta, waxaana jira walaac xooggan oo soo foodsaaray xiriiradii kala duwanaa ee u dhaxeeyay dadka ku kala nool goboladan iyo magaalada muqdisho.

 

Muxyaddiin cali jimcaale jakuula

Muqdisho-Somalia