Khilaafka soo kala dhex galay maleeshiyooyinka Daacada u ah Madaxweyne C/laahi Yuusuf iyo Kuwa Max’ed Dheere oo ku wada sugan magaalada Jowhar ayaa sii xoogeystay ka dib markii ay adkaatay in xal laga gaaro xiisadii uu ku dhintey mid ka mid ah maleeshiyooyinka Puntland.

Taliyaha maleeshiyooyinka Col. C/laahi Yuusuf ee xerada Congo oo la yiraahdo Saciid Dheere ayaa laga soo xigtey in uu mudo 3 cesho ah u qabtey gacan loo soo galiyo ragii ka dambeeyay dil iyo dhaawac lagula kacay maleshiyooyinka Puntland ee ku sugan xerada Congo, isagoo sheegay hadii aan taas la yeelin in ay dhici karto dhibaato ay iyaguna geeystaan ama dagaal dhex mara maleeshiyooyinka Max’ed Dheere iyo kuwa Puntland ee ku wada sugan Jowhar.

Arintaan ayaa cirka isku shareertay ka dib markii lacago diyo ah loo geeyay maleeshiyooyinka Puntland ay ku gacan seyreen oo ay sheegeen in ay doonayaan in loo soo gacan galiyo ragii falkaasi geystay.

Tababarayaal Ethiopian ah oo ku sugan Xerada Congo ayaa iyagu cabsi ka muujiyay dhibaato ka soo gaarta isku dhac dhex mara labada maleeshiyo, iyadoo la sheegay in ay doonayaan in dib loogu celiyo dalkooda.

Wararka ayaa waxa ay intaasi ku darayaan in Max’ed Cumar Xabeeb Max’ed Dheere uu wax ka qabanwaayay arimahaasi, iyadoo lagu wado in uu soo faragaliyo Madaxweyne C/laahi Yuusuf.

Muxudiin Cali Jimcaale Jakuula

Muqdisho

Jakuula@hotmail.com