Jeneral Cali Madoobe oo ku howlan sidii laysugu keeni lahaa Ciidanka Booliska Somaliya,

Taliyaha Booliska Soomaaliya Cali Maxamed Xasan looyaan oo loo yaqaan Cali Madoobe ayaa waxa uu sheegay inuu ku howlan yahay isku keenida Booliska Soomliyeed ee ku kala firdhaday dagaaladii Sokeeye ee dalka ka qarxay .

Jen. Cali Madoobe oo la sheegay inaan ku wanaagsaneyn ku hadalka Afka carabiga ayaa u sheegay Wargeyska Alahraam inay kala tageen Booliskii oo ay u kala firdhadeen Gobolada kala gedisan ee Soomaaliya intii lagu guda jiray sanadihii 14-ka ahaa ee ugu dambeeyay.

Waxa uu sheegay in Tiro ka mid ah saraakiil Boolis ah uu tababar ugu diray dalka Uganda si loogu tababaro inay noqdaan tababarayaal , waxa uuna sheegay inuu qabtay kulan lagaga hadlayay qaabka loo dhisi karo Boolis Cusub iyadoo laga faa’ideysanayo qorshaha Cusub ee 5 –ta sano ee laga fulinayo Guud ahaan Soomaaliya laga soo bilaabo Hargeysa ilaa iyo Magaalada Kismaayo ee konfurta Soomaaliya .

Cali Madoobe waxa uu sheegay in laga furi doono Magaalada Boosaaso ee waqooyi Bari Soomaaliya Akeedimiyadda Booliska bisha December ee fooda nagu soo heysa , iyadoo arintaasina ay gacan ka geysaneyso Hey’adda UNDP , waxaana suuragal ah ayuu yiri in Masar ay ka qeybqaadato howlaha Tababarada .

Sarkaalkan waxa uu sheegay in Booliska aaney shaqeyn Karin iyadoo aan loo heli mushaarooyin ay ku noolaadaan , waxa uuna qiray in khilaafka ka dhex oogan dowladda FS uu sababay inuu hakad galo kaalmooyin badan oo Booliska uu soo gaari lahaa , waxa uuna sheegay sida uu qabo in Mucaarad uu jiri karo si dibiici ah balse aanu waajib aheyn inuu hakad galo kaalmooyinka , waxa uuna xusay in Siyaasaddii Siyaad Barre oo taageero ka heysatay dalalkii Soofiyeetiga , Carabta iyo Mareykanka intii uu socday dagaalkii qaboobaa ay la burburtay dowladiisa fikir beeleed.

Taliyaha Booliska Soomaaliya ayaa waxa uu ka digay in dib u heshiisiinta aaney noqoneyn mid waxtar leh ilaa iyo inta Booliska uu xal uga helayo amaanka , waxa uuna sheegay in Soomaaliya ay noqotay goob laga dhoofiyo waxyaabaha Mukhaadaraatka oo loo safriyo dhinaca Khaliijka Carbeed iyo dalal kale , waxa uuna tilmaamay inay jiraan garoomo badan oo diyaaradeed oo aanu qofna ogeyn waxa laga dhoofiyo iyo wax ka soo dega , waxa uuna sheegay in Muqdisho oo kaliya ay ku yaalaan 8 garoomo diyaaradeed oo saacad kasta ay diyaarad ku soo degto .

Jen. Cali Madoobe waxa uu sheegay in dambiyada ugu weyn xilligan uu yahay Soomaalida loo tahriibinayo Yurub ama Yemen , iyadoo sanad kasta kumanaan ruux ay ku geeriyoodaan badaha iyagoo ku socda doomo dhamaad ah , waxa uuna sheegay in Burcad badeed badan oo Soomaali ah ay isku fidiyeen xeebaha dheer ee Soomaaliya oo looga talaabo dalal badan oo Afrikaan ah .

Waxa uuna cadeeyay in waxyaabo haraaga sunta Nukliyeerka oo booyado aan la garaneyn ku jira in lagu soo tuuro Xeebaha Soomaaliya , waxa uuna sheegay in dalka la keeno dawo iyo cuno waqtigeedu iyo waxtarkeedu uu dhamaaday , waxa uu sheegay in arintaasi uu sababay inay dhashaan caruur muuqaalkooda badalan yahay , waxa uuna sheegay in dil joogta ah maalin kasta loogu geysto Muqdisho Saraakiil Booliska ka tirsan , Shaqsiyaad Madax ah iyo dad caan ka ah Soomaaliya .

Muxyadiin Cali jimcaalle jakuula

jakuula@hotmail.com

Muqdisho Somaliya