Midowga Yurub ayaa bayaan uu soo saaray waxa uu ku sheegay inuu si buuxda u taageerayo hindisaha nabada ee Ra’iisal wasaaraha Soomaaliya iyo isku daygiisa ku wajahan inuu wada xaajood la galo wasiirada ku sugan magaalada Muqdishu ee fikir ahaan ka soo horjeeda tan Madaxweynaha iyo inta kale ee labada Gole Dowladda kuna sugan Magaalada Jowhar.

Midowga Yurub ayaa waxay sheegeen in hindisahan uu yahay mid wanaagsan isla markaana Midowga Yurub ugu baaqayo wasiirada jooga Muqdisho inay aqbalaan wadahadalka.

Midowga Yurub waxa uu ku faraxsan yahay inuu xasuusiyo dowlada Soomaaliyeed in wadamada caalamka ee deeqaha bixiya ay ogolaadeen inay dhaqaale ku bixiyaan hindisaha nabada ee Ra’iisal wasaare Geeddi.

Bayaanka waxaa kaloo lagu sheegay in Midowga Yurub uu aaminsan yahay in tani ay tahay talaabo muhiim ah oo loo qaadayo jihada xal ka gaarista arrimaha la isku hayo ee ay isku khilaafeen hay’adah dowlada KMG, isla markaana Midowga Yurub waxa uu isku dayayaa sidii uu meel mar u noqon lahaa kulanka lagu wado inuu ka dhaco Muqdishu ee ay isugu imaanayaan wasiirada is khilaafsan.

Waxa uu ku boorinayaa dhamaan Soomaalida inay ka faa’iideystaan fursada hindisaha nabada, waxa uuna Midowga Yurub carabka ku adkeeyey baahida loo qabo in dhamaan dhinacyada is haya ay meel iska dhigaan khilaafka, si loo xaqiijiyo in golaha wasiirada,baarlamaanka iyo madaxda kale ee dowlada ay ku shaqeeyaan wadajir iyo nidaam ku dhisan cadaalad iyo is aaminaad.

Hase ahaatee Midowga Yurub waxa uu walaac ka muunjinayaa warar dhawaan soo baxay oo sheegaya in dhaqdhaqaaq militari uu ka jiro qeybo ka mida dalka Soomaaliya, taasoo Midowga uu ku sheegay mid kicinaysa xiisad colaadeed.

jakuula@hotmail.com