Maxkamadaha gobolka Banadir ayaa markii ugu horeysay soo saaray khudbooyin qoraalo ah oo ay ugu talo galeen salaada ciida ka dib kulan ay maanta ku yeesheen xarunta maxkamada warshada Caanaha.

Kulanka maanta ay yeesheen midowga maxkamadaha islaamiga gobolka Banadir oo ay ka soo qeybgaleen khadiibyada masaajidyada magaalada Muqdisho ayaa looga hadlay arimo badan oo la xiriira sidii halmar loo dukan lahaa salaadda ciidda iyo si hal khudbo oo ka hadleysa wacyiga dalka looga jeedin lahaa masaajidyada iyo goobaha kale ee salaadda Ciida lagu tukanayo.

Qoraalka Khudbadan oo ka kooban 3 bog isla markaana ay soo diyaariyeen qaar ka tirsan khadiibyada Muqdisho ayaa loo qeybiyay ilaa 40 masaajid oo kulankaasi wakiilo ka socday ay ka qeybgaleen, iyadoo masaajidyadii aan ka soo qeybgalin kulankaasi khudbooyinkaasi loo dhigay ilaa 3 masaajid oo ku yaala magaalada Muqdisho.

Kulankaan ayaa waxaa ka hadlay Gudoomiyaha midowga

Maxkaamiinta Muqdisho Sheekh Shariif Sheekh Axmed oo u jeedada khudbadaasi ku sheegay in ay tahay sidii umadda Soomaaliyeed ay isku cafin lahaayeen iyo sidii si wada jir ah looga soo horjeesan lahaa waxyaabaha munkarka aha ee diinta ay ogoleyn.

Khudbada maanta loo qeybiyay khadiibyada magaalada Muqdisho oo ay ku xusneyd wax qabadkii maxkamadaha ee Bishaan Ramadan ayaa hadana waxa ay ku booriyeen shacabka Soomaaliyeed in ay si wada jir ah u ciidaan.

Maxkamadaha ayaa waxa ay sheegeen inmaalinta ciida ah si buuxda loogu dukan doono fagaaraha Istadio Muqdisho oo ay isugu imaan doonaan dad aad u fara badan, waana markii ugu horeysay oo maxkamadaha ay qeybiyaan qoraalo nuucaan oo kale ah oo loogu talo galaya in si wada jir ah looga jeediyo masaajidyada iyo goobaha kale ee lagu tukanayo salaadda ciida.

muxyadiin cali jimcaalle jakuula

jakuula@hotmali.com

muqdisho somaliya