Max’ed Cumar Xabeeb Max’ed Dheere oo gacanta ku haya gobolka Sh/dhexe ayaa sheegay in aysan jirin habayaraatee wax khilaaf ah oo uu soo kala dhex galiyay isaga iyo Madaxweyne C/laahi Yuusuf iska horimaadkii Dhowaan ka dhex dhacay maleeshiyooyinka Puntland iyo kuwa Jowhar ee ku wada sugnaa xerada Congo ee ku taaal duleedka magaalada Jowhar.

Gudoomiyaha gobolka Sh/dhexe ayaa ku macneeyay arin aan ku talagal aheyn oo ku dhacday si fudud iska horimaad dhex maray maleeshiyooyinka Puntland iyo kuwa Max’ed Dheere ee ku sugan magaalada Jowhar taas oo ay ku dhinteen kuna dhaawacmeen labo askari oo reer Puntland ah..

Max’ed Dheere oo diiday jiritaanka warar sheegayay in uu Madaxweyne C/laahi Yuusuf u qorey codsi uu ku dalbnanayo in la yareeyo tirada maleeshiyooyinka Puntland ee jooga Magaalada Jowhar ayaa waxa uu sheegay in arimahaaasi ay ahaayeen kuwo aan saameyn badan ku yeelan wada jirka maleeshiyooyinka C/laahi Yuusuf iyo kuwa Max’ed Dheere ee jooga Jowhar.

Max’ed Cumar Xabeeb Max’ed Dheere oo ka hadlay horumarka gobolka Sh/dhexe uu sameeyay tan iyo markii ay fariisin ka dhigatay gobolkaasi garabka ka mid ah dowladii lagu soo dhisay Impagati ayaa waxa uu sheegay in isbadalka magaalada Jowhar oo dhismayaal cusub iyo dhaqaaleba la galiyay uu yahay mid soo jiitay waxa uu ku tilmaamay indhaha caalamka, isagoo ku tilmaamay magaalada Muqdisho oo caasimadda Somalia ahna ay ka mid tahay wali meelo loo diidan yahay in ay gaarto xasilooni iyo horumar oo uu sheegay in ay ka hortaagan yihiin shaqsiyaad ay isku hayaan siyaasadda.

Gudoomiyaha gobolka Sh/dhexe Max’ed Cumar Xabeeb Max’ed Dheere oo dhinaca kale ka hadlay walwalka dunida ay ka muujineyso in Somalia noqoto meel ay asal raacnimadu ku sii xoogeysaneyso ayaa sheegay in ay jirto kooxo asal raac ah oo xiriir la leh ururka Alqacida, isagoo ku eedeeyay in uu hogaamiyo kooxahaasi Sheekh Xasan Daahir Aweys oo dhowaan barnaamij laga sii daayay Tvga kanaal 4 ee dalka Engriiska u sheegay in uu heysto ciidan gaaraya ilaa 3 kun.