XAALADA DIB U URURINTA HUBKA EE MAGAALADA MUQDISHO

Waxaa maal mahanba ka socday Magaalada Muqdisho hawl hub uruurin oo ay wadeen hogaamiyo kooxeedyadii ku hubeysnaa caasimada Xamar oo haatan ku magacaaban masuuliyiin ka tirsan xubnaha labada gole ee DFKS. Hawshan oo ay soo dhaweeyeen dhamaan shacbiga reer Muqdisho, Masuuliyinta dawlada ee kusugan Narobi iyo dawladaha daneeya arimaha Soomaaliya.Talaabadan oo ku bilaamatay si dar dar ah ayaa hada ah mid aanay waxba ku soo kordhin tan iyo markii hawshan bilaamatay mudo hada laga joogo todobaadyo. Maleeshiyadan oo la isugu geeyay laba goobood oo kala ah Hiilwayne iyo Laanta buuro, ayaa lagu qiyaasayaa tiradooda 500 ilaa iyo 700 oo maleeshiyol gaadiidkooduna yahay ku dhawaad 70 baabuurta gaashaaman ah .dhaqaalaha lagu masruufayo maleeshiyadan ayaa ka kooban mid ay iska uruuriyeen qurba joogta iyo ganacsatada kusugan Muqdisho, waxaana sidaa saxaafada u xaqiijiyay masuuliyiinta labada gole ee hawshan gacanta kuhaya .

Mar wax laga waydiiyay Wasiirka dhaqan celita mundane Bootaan Ciise Caalim dhaqaalaha ay hawshan u hayaan fulinteeda ayaa waxa uu daaha ka qaaday in aanay wax dheeq lacageed ah oo hawshan ku filan aanay haba yaraatee u hayn waqtigan xaadirka ah. Sidookale Gen. Maxamed Nuur Galaal oo ah masuulka u xil saran tobabarida maleeshiyada ayaa warbaahinta u sheegay in xaalada baabuurta gaashaaman ee ilaa hada soogaaratay labadan xero ay tahay mid aan wanaagsaneyn isaga oo sababta ku sheegay in qoryaha baabuurtan saaran ay yihiin kuwo aan dhacaynin oo aan la isticmaali karin iyo kuwo ay rasaastoodii ka maqantay. Jananku waxa uu sheegay in cilada arintan ka danbaysaa ay tahay is aamin la'aantii horjoogayaasha kooxaha hubaysan oon wali is badal wayn aanu ku dhicin . Sida ay sheegayaan dad u dhuun daloola hubkadhigista maleeshiyada ayaa ka dayrinaya guul ka dhalata arintan hadii aan xal loo helin kala duwanaanta masuuliyiinta labada gole ee ku kala sugan muqdisho iyo Nairobi. Sababta oo ah dhaqaalo darada jirta oon looga maarmeyn in masuuliyiinta dawlada ugu sareysa in ay u qoondeeyaan misaaniyada ku baxaysa hawshan iyo in aanay hawshan oo kale ka daba sameyn marka ay dalka ku soo laabtaan dhamaadka bishan.

Abdifatah Maxamed Abdinur

RSTV Minnesota, USA