Xubanaha labada gole ee Dowlada FS Ayaa maanta kulan xasaasi ah oo loogu arinsanayo Safarka uu Madaxweynaha ku marayo goboloda dalka qaarkood ku yeeshay Hotelka Saxafi Ee magaalada Muqdisho.

Xubnahaan labada gole ee dowlada FKMG ee Soomaaliya kuna sugana Muqdisho, ayaa maanta kulan saacado qaatay ku yeeshay Hoteelka Saxafi ee magaalada Muqdisho, waxayna isla falanqeeyeen socdaakla uu hada bilaabay Madaxweynaha uuna ku marayo sida uu sheegay madaxweynaha gobolada dalka qaarkood, sida Bakool, Hiiraan Iyo Kuwo Kale.

Shirkan oo xubnihii ka qeybgalay ay ku jireen wasiirada & xildhibaanada hubeysan ee Muqdisho ku sugan, ayaa waxaa la iskula soo qaaday ajendayaal ay ka mid ahaayeen marxalada guud ee dalka, howlaha nabadeynta magaalada Muqdisho & socdaalka la sheegay in madaxweyne C/llaahi Yuusuf uu ku tegay deegaanka Mustaxiil, waxaana gebo-gebadii kulankaasi saxaafadda la hadlay Xildhibaan Cumar Xaashi Aadan oo ah afhayeenka xubnada dowlada ee Muqdisho ku sugan, wuxuuna saxaafadda u sheegay Cumar Xaashi in socdaalka madaxweynuhu ku tegay deegaanka Mustaxiil uu ahaa mid haadaan ku sii ridaya khilaaf-ka ka dhex jira dowladda.

Waxaana ay walaac aad u daran xubnaha muqdisho ku sugan ka muujiyeen safarka madaxweynaha oo ka biloowday gobolada ismaamul goboleedka Itoobiya, waxayna sheegeen in Itoobiyaanka uu madaxweynaha la kulmayo iskuna soo qaadi doonaan sidii uu ku heli lahaa hub uu weerar ugu qaado Muqdisho waa sida ay hadalka xubnaha dowlada ee Muqdisho ku sugan u dhigeene.

Waxaana shalay iyo maanta laga sugayay madaxweynaha in uu gaaro magaalada Baladweyne ee xarunta u ah Gobalka Hiiraan, balse waxaa lala yaabay markii ay qoraxda dhacday lana waayay wafdiga uu madaxweynaha hogaaminayay, dadweynahii reer Hiiraan oo safaf dheer ugu jireen soo dhaweynta madaxweynahana ay iska dareereen xalay fiidkii iyagoo niyad jabsan.

Waxaana dadweynaha reer Muqdisho qaarkooda Sida odoyaasha Garcad-ka ah ay ku qaxweynayeen saakay ""in ay arrin laga xumaado ay tahay madaxweyne uu tago tuulooyin ay ciidamo Itoobiyaan ahi degan yihiin, uuna ugu yeero in ay ugu yimaan xubnaha labada gole dowladda ee Hiiraan ka soo jeeda, maamulkii gobolka & odayaasha dhaqanka gobolka & saraakiil Itoobiyaan ah Mustaxiil", waxayna hadalheyntaan oo badanaa reer muqdisho isla qabaan ay ku tusaysaa sida ay ugu naxeen madaxweynaha safarkiisa marka uu ka bilaabay deegaano hoos yimaadaan wadanka Itoobiya.