Kulan ballaaran oo looga hadlayay sidii loo taageeri lahaa gudoomiyaha cusub ee gobolka Banaadir oo maanta ka dhacay hotelka Ramadan ee magaalada Muqdisho.

 

Kulan ballaaran oo ay kasoo qeyb galeen siyaasiyiin ,wax garad odayaal dhaqameedyo iyo xubno ka socday xubnaha labada gol ee dowlada kumeel gaarka ah ee Soomaaliya ee magaalada Muqdisho ku sugan ayaa maanta ka dhacay hotelka Ramadan ee magaalada Muqdisho .

 

kulankan ayaa waxaa soo agaasimay imaamka beesha Hiraab Imaam Maxamud Imaam Cumar waxaana kasoo qeyb galay xubno ay ka mid ahaayeen ra'isulwasaare ku xigeenka dowlada ku meel gaarka ah ee Soomaaliya ahan wasiirka arimaha gudaha Xuseen Maxamed Faarax Ceydiid .

 

Ujeedka rasmiga ah ee kulankan ayaa lagu sheegay in uu yahay sidoo loo taageeri lahaa gudoomiyaha cusub ee gobolka Banaadir ee dhawaan uu soo magacaabay ra'isulwasaare Cali Maxamed Geedi .

 

Xubnihii ka qeyb galay kulankan oo hadallo fara badan halkaa ka jeediyay ayaa dhamaantood muujiyey sida lagama maarmaanka ay u tahay in gobolka Banaadir uu yeesho maamul xooggan oo wax ka qabta xaalada amaanxumo ee gobolka ka taagan iyo sida loogu baahanyahay in la wada taageero gudoomiyaha loo soo magacaabay gobolka Banaadir.

 

Gudoomiyaha gobolka Banaadir ahna duqa magaalada Muqdisho Maxamud Xasan Cali Gaabow ayaa sheegay inuu ku dadaalayo sidii gobolka Banaadir uu u noqon lahaa meel amaankeeda la isku halayn karo  iyo sidii uu ku kasban lahaa kalsoonida shacabka.

 

Kulankan maanta ka dhacay hotelka Ramadan ayaan ahayn kulankii ugu horeeyey oo lagu muujinayo taageerada loo hayo gudoomiyaha cusub ee gobolka .