Xildhibaan Cabdi Cabdulle Saciid Jinni Boqor oo ka mid ah mudanayaasha Baarlamanka ee ku sugan magaalaada Muqdisho ayaa sharci darro ku tilmaamay heshiiska garabka Jowhar ay magaalada Nairobi kula galeen shirkad laga leeyahay dalka Mareykanka oo ilaalineysa xeebaha Somalia.

Cabdi Cabdulle Saciid Jini Boqor oo wareysi siiyay saxaafadda Muqdisho ayaa sheegay in heshiiskasta oo ay galeyso xukuumadda ay tahay mid la og yahay uuna ogolaasho ka heysto Baarlamanka FS isla markaana uu musuqmaasuq yahay heshiiska Ra’isulwasaare Geedi iyo wasiirka Kaluumeysiga Xasan Abshir ay magaalada Nairobi kulagaareen Shirkad Mareykan ah oo ilaalisa xeebaha Somalia.

Heshiiska shirkadan lala galay ayuu Jini Boqor ku sheegay mid horey uu magaalada New York uu ugu soo galay Madaxweynaha dowladda FS C/laahi Yuusuf Axmed ee uu yahay midka ka dhacay Nairobi wajiga labaad ee heshiiska.

Xildhibaan Jini Boqor ayaa intaasi raaciyay in heshiisyada lala galayo shirkadaha madaxa banaan ay horseedi karto in si sahlan badaha Somalia loogu shubi karo sunta haraaga Nuclearka, isagoo gabi ahaanba sharci darro ku tilmaamay dhamaan heshiisyadii ay galeen dowladda FS garabka Jowhar, iyadoo uu ku sheegay in ay tahay mid Madaxweyne C/laahi Yuusuf iyo kooxdiisa ay ku takrifaleen nidaamka iyo dastuurkii u yiilay dowladda FS.

Hadalka Jini Boqor ayaa yimid xilli maalintii shalay ay heshiis magaalada Nairobi ku kala saxiixdeen shirkad Mareykan ah oo xagga amaanka badaha qaabilsan oo la yiraahdo toobaag iyo dowladda FS garabka Jowhar, heshiiskaasi oo socon doono mudo labo sano ah ayna ku baxeyso 50milyan oo doollarka mareykanka.

Muxyadiin Cali Jimcaalle Jakula

jakuula@hotmail.com

Muqdishu, Soomaaliya