Xildhibaano ka tirsan Baarlamanka Somalia oo fadhigoodu yahay magaalaada Muqdisho ayaa ku tilmaamay kulanka maanta lagu wado in uu wasiirada arimaha dibadda IGAD uga furmo magaalada Jowhar riwaayad loogu dhigayo garabka Jowhar ee uu hogaamiyo Madaxweyne C/laahi Yuusuf.

Xildhibaan Cabdi Cabdulle Saciid Jini Boqor oo u waramay saxaafadda Muqdisho ayaa waxa uu sheegay in kulankaasi uu yahay mid xagal daacinaya geedi socodka nabadda Somaliya isla markaana uu yahay mid dowladda Ethiopia ay ruwaayad ugu dhigayso garabka C/laahi Yuusuf ee dowladda FS waa sida uu hadalka u dhigaye.

Jini boqor waxa uu sheegay in loo baahan yahay in urur goboleedka IGAD uu dhex dhexaad ka noqdo arimaha khilaafka dowladda isla markaana aysan habooneyn in dhinac ay la saftaan.

Jini Boqor waxa uu dhinaca kale gaashaanka ku dhuftey in ay fashilmeen howlihii nabadeynta oo ay ka wadeen magaalada Muqdisho, waxa uuna sheegay in ay u mareyso meel wanaagsan.

Muxudiin Cali Jimcaale Jakuula

Jakuula@hotmail.com

Muqdisho Somalia