Waxaa xalay lagu soo gabagabeeyey magaalada Baraawe shir Muddo Saddex Maalmood ah uga socday halkaas Siyaasiyiin iyo waxgarad ka tirsan Beesha Ceyr iyo Mareexaan, kuwaas oo ka kala yimaadeen Kismaayo iyo Magaalada Muqdisho.

Siyaasiyiinta oo ay ka mid ahaayeen madaxda Isbaheysiga Dooxada Jubba, Maamulka Shabeelaha Hoose, xubno ka tirsan Baarlamaanka Federaalka soomaaliya iyo kuwa kale ayaa waxyaabaha looga hadlay waxaa ka mida ahaa in laga hortago cadawga Soomaaliya iyo in shir ka ballaaran midkan mar kale la qabto.

Guddoomiyaha Maamulka Shabeelaha Hoose Sheekh Yuusuf Maxamed Siyaad (Indha Cadde) ayaa sheegay in shirkii Labadii Maalmood ee la soo dhaafay ka socday degaanka Baraawe ku dhamaaday guul wanaagsan.

Arrimaha lagu heshiiyay ayaa waxaa ka mid ah in la sameeyo Ismaamul Goboleed ay u dhan yihiin beelaha dega Jubbooyinka iyo shabeelaha Hoose, sidoo kale shirkan ayaa waxaa lagu dhameeyay khilaaf u dhaxeeyay xubnaha kala ah Barre Hiraale iyo Yuusuf Mire Seeraar oo Labadaba ka mid ah Isbaheysiga Dooxada Jubba.

Maanta ayaa la filayaa in war ay u dhan yihiin ka soo saaran magaalada Baraawe sida uu sheegay Sheekh Yuusuf Indha Cadde oo ka mid ahaa siyaasiyiintii ka qeybgashay kulanka.