Golaha Haweenka Nabadeeynta Qaranka Soomaaliyeed oo gaaraya illaa 180 xubnood ayaa maanta Somalinet u sheegay inay diyaar u yihiin u kala dab qaadista xubnaha dowladda ee kala joogga muqdisho iyo jowhar.

Haweenkan ayaa sheegay in soomaaliya xilligan aysan u laaban karin waxa ay ku sheegeen kala qeybsanaanta qaranka Soomaaliyeed oo dhowaan lagu soo yagleelay magaalada nairobi, isla markaasina loo huray waqti farabadan.

Drs Cambaro Xaaji Xasan oo haweenkan Gudoomiye u ah ayaa sheegtay inay sida ugu dhaqsiiyaha badan ergo haween ah ugu dirayaan magaalada jowhar si loo baajiyo kala qeybsanaanta dowladda federaalka Soomaaliya.

Waxaa kaloo ay sheegtay in haweenku yihiin kuwa marwalba u nugul dhibaatada sidaasi daraadeedna ay doonayaan inay dhameeyaan qilaafka dhinaca fikirka ah ee dowladda federaalka, waxaana ay xustay inay buuxin doonaan kaalintii haweenka Soomaaliyeed lagu aqoon jiray.

Haweenkan ayaa dhowaan la kulmay Wasiirka dib u dhiska Dowladda federaalka Soomaaliya Barre Aadan Shire Hiiraale, oo isagu doonaya in meel dhexe ay xubnaha is qilaafsan isugu yimaadan.

jakuula@hotmail.com