Xubnaha labada gole ee magaaldda Muqdisho ayaa maanta kulan ay ku yeesheen Hotel Saxafi kaga hadleen arimo la xiriira shirka la sheegay in wasiirada arimaha dibadda ee dalalka IGAD ay ku yeelan doonaan Jowhar iyo lacagaha been abuurka ah oo ay sheegeen in dhowaan la soo galiyay magaalada Muqdisho.

Kulankii maanta ay yeesheen xubnaha labada gole ee dowlada FS garabka Muqdisho oo ahaa mid ay albaabada u xirnaayeen ayaa gabagabadii waxaa saxaafadda la hadlay xildhibaan Cumar Xaashi Aadan oo sheegay in ay ka wada hadleen shirka la sheegay in Jowhar ay ku yeelanayaan 9 ka bishaan wasiirada arimaha diabadda ee dalalka IGAD oo ay ku tilmaameen in uu yahay mid muujinaya in IGAD ay la safatay garab ka mid ah dowladdii Kenya lagu soo dhisay isla markaana aaney dhex dhexaad ka aheyn arimaha Somalia, iyagoo ugu baaqay IGAD in ay ka fiirsato kulankaasi isla markaana ay dhex dhexaad ka noqdaan arinta labada gole ee DFS.

Xubnaha labada gole ee dowladda FS ayaa waxa ay sidoo kale kulankooda uga hadleen lacagaha been abuurka ah ee ay sheegeen in dhowaan la soo galiyay magaalada Muqdisho oo ay sheegeen in lagu soo daabacay magaalada Boosaso isla markaana ay qatar ku tahay dhaqaalaha dalka, iyagoo uga mahadceliyay sarifleyaasha iyo ganacsatada qaar sida ay uga hortageen lacagahaasi been abuurka ah.

Sidoo kale waxa ay sheegeen in ay ka xun yihiin xasuuqa ka dhacay dalka Ethiopia ee ka dhashay natiijada doorashooyinkii Baarlamanka dalkaasi oo ay sheegeen in markii malezenawi looga guuleystay doorashadaasi uu bilaabay in uu xasuuq iyo xarig u geysto xubno ka tirsan mucaaradka dalkaasi iyo dad rayid ah oo banaanbaxyo dhighayay.

Kulankii maanya ayaa waxaa goobjoog ka ahaa wasiirka ganacsiga dowladda FS Muuse Suudi Yalaxow iyo wasiirka amiga qaranka dowladda FS Max'ed Qanyare Afrax.

Muxyadiin Cali jimcaalle jakuula

jakuula@hotmail.com

Muqdisho Somaliya