R/wasaare Geedi ayaa u dhoofay wadanka Senegal.

Ra’isulwasaaraha dawlada federaalka kmg ah ee Somalia Cali Maxamed Geedi iyo wafdi uu horkacayo ayaa duhurnimadii maanta ka ambabaxay magaalada Jowhar ee xarunta gobolka Shabelaha dhexe .Geedi iyo wafdigiisa ayaa u dhoofay wadanka Senegal ee galbeedka Africa ku yaalla balse waxa ay kusii hakandoonaan magaalada Djibouti ee caasimada wadanka Djibouti.

Geedi ayaa socdaalkiisa waxaa ku wehliya xubno ay ku mid yihiin wasiirka warfaafinta dawlada Somalia Maxamed Xayir ,wasiirka qorsheynta iyo iskaashiga caalamiga ah  C/risaq Jurille ,afhayeenka dawlada Somalia C/raxman Nuur Maxamed Diinaari iyo xubno kale.Wafdiga Geedi oo halkaasi  muddo todobaad ah ku sugnaan doono  ayaa waxa  martiqaad ay ka heleen madaxweynaha wadanka Senegal .

Ujeedka socdaalka Geedi iyo wafdigiisa ayaa lagu sheegay in tahay la kulanka wasiirka arimaha dibada mareykanka Kondaliza Rays oo dhawaan la filayo in ay halkaa soo gaarto sida uu u sheegay saxaafada afhayeenka dawlada C/raxman Diinaari.Lama yaqaan sababta rasmiga ah ee ka danbeysa kulanka dhexmaraya Rays iyo wafdiga ra’isulwasaaraha dawlada federaalka kmg ah ee Somalia .

Maxamed Cumar Sheekh (Maxamed Cadde)
Rochester Somali Tv Muqdisho

Cadde_8@hotmail.com