Guddoomiyaha  gobolka Banaadir ahna duqa magaalada Muqdisho Maxamuud Xasan Cali cadde iyo wafdi uu horkacayo ayaa gelinkii hore soo  gaaray magaalada Muqdisho

Wafdiga gudoomiyaha oo ay ka mid ahaayeen  xildhibaano uu ka mid ahaa xildhibaan C/laahi Geeddi Shadoor iyo wasiirro uu ka mid ahaa wasiiru dowlaha arrimaha dibadda Ibraahim sheikh cali Jeebbo ayaa ka soo dagay garoonka diyaaradaha ee Cisiley oo ku yaalla duleedka Woqooyi ee magaalada Muqdisho. Wafdiga ayaa waxaa  garoonka ku soo dhaweeyey dadweyne fara badan  iyo qaar ka mid ah ciidanka  Minashiibiyada

Wafdiga gudoomiyaha uu horkacayo ayaa waxaa la dejiyey hotelka Ramadan ,wuxuuna halkaasi kula Hadley dadweynihii iyo mas'uuliyiintii kasoo qeyb gashey soo dhaweyntiisa asagoo u mahad celiyay sida hagaagsan ee ay u soo dhaweeyeen.

Waxaana dadkii halkaa isugu yimid la yaab ku noqotay oo ay isweydiinayeen Maamulkii hore ee gobolka Banaadir sida Guddoomiyihii hore C/laahi Xasan Ganay firinbi iyo duqii hore Ibraahim cumra sabriye shaaweeye aaney qayb galin qaadanin soo  dhawaynta duqa cusub ee magaalada Muqdisho inkastoo ay horay ballan ugu qaadeen in ay soo dhaweynayaan lana shaqaynayaan haddii uu dalka soo gaaro guddoomiyaha cusub ahna duqa magaalada Muqdisho xilkana ay  ku wareejin doonaan.

 

Genaral Naaji oo sheegay in la isugu yeeri doono ciidankii xooga dalka

Taliyaha ciidammada xoogga dalka Somaliyeed  Genaral Ismaaciil Qaasim Naaji ayaa sheegay in dhawaan   la isugu yeeri doono ciidammada xoogga dalka somaaliyeed,si ay u howshoodii  qaranka ay u hayn  jireen  dib ay ugu bilaabaan.
 

Naaji oo ka mid ahaa wafdigii ra'iisul wasaaraha  uu hor kacayay ee shalay gelinkii danbe soo gaaray  magaalada Jowhar ayaa sheegay in dowladda federalka kmg ah ee Somaliya ay  ciidamadii hore ee qaranka  dib isugu  abaabuleyso si howshooda degdeg ay ugu bilaabaan oo ay soo celiyaan amaanka mudada dheer ka maqnaa umada Soomaaliyeed. General Naaji oo saxaafadda la hadlayey asagoo jooga magaalada Jowhar ayaan soo hadal qaadin sida laga yeelayo maleeshiyooyinka dhawaan laga saaray magaalada Muqdisho ee tababarkuna uu  uga socdo xeryaha Hiilwayne iyo Laanta buuro ee gobolka Shabeelaha dhexe iyo Shabeelaha hoose laakiin waxa uu carabaabay in sanadkan dawladu ay qoroneyso ciidamo cusub oo aan aheyn kuwii hore kuwaasoo gaaraya toban kun askari da'dooduna aaney ka badney 25 jir ,ayadoo sanadka soo socdana la qorayo ciidan mid kan oo kale ah .

Hogaamiye kooxeedyadii wasiirada noqday ee maleeshiyooyinkan ay ka amar qaataan  ayaa sheegay in maleeshiyooyinkan  ay ka mid noqon doonaan ciidanka xooga dalka Soomaaliyeed. Dhanka kale wafdigii  dowladda ka socday ee shalay soo  gaaray magaalada Jowhar ayaa qaarkood waxa ay  bilaabeen maantaa in ay magaalada kusoo wareegaan ayagoo soo indha indheynaya xaalka magaalada.

 

Ciidamo gadoodsan oo  daraawiishta Puntland ka tirsan oo la wareegay xarunta gobolka ee magaalada Gaalkacyo. 

Ciidammada daraawiishta ee maamul goboleedka Puntland ayaa maanta la wareegay xarunta gobolka ee magaalada Gaalkacyo ka dib markii ay sheegeen in ay ka tabanayaan  waxyaabo fara badan oo dhibaatooyin ah maamulka Puntland .Ciidankan ayaa ka cabanaya in xaqii ay ku lahaayeen macaawino ay soo dhiibtay dawlada Shiinaha aan laga siin,qabsashada xaruntanna ay fariin u tahay maamulka

Ciidanka daraawiishta maamul goboleedka puntland ayaa isku dayay in ay ciidankan qabsaday xarunta ka saaraan laakiin waa ay usuuroobi waysay ka dib markii ciidanka qabsaday xarunta ay halkaa dhufeyso adag ka sameysteen. Afhayeen u hadlay ciidanka daraawiishta ee  maanta la wareegay gacan ku haynta xarunta  gobolka ee magaalada Gaalkacyo ayaa sheegay in dhowrkii bilood ee la soo dhaafay aanay helin   mushaaharkii  ay xaqa  u lahaayeen iyadoo maamulka puntland uu iska dhaga tiray codsiyo dhowr ah oo ay u gudbiyeen.

Bilihii   la soo dhaafay waxaa khilaafaad aad u xoogani ka dhex aloosnaa ciidammada daraawiishta iyo maamulka magaalada Gaalkacyo  dhinaca raacsan maamul Puntland iyadoo ciidammadu dhowr mar ay  amar diiddo sameeyeen ayna xarumo maamulku leeyahay la wareegeen iyagoo mar walbana ka sheeganayey  qaabka maamulku uu  wax u maamulayo.