Ciidamada Booliska Puntland oo dhowrkii maalmood ee lasoo dhaafay waday howgal ballaran oo ay ku beegsanayaan maraakiibta sharci darada ah ayaa waxay soo qabqabteen Lix doonyood oo Kalluumeysi ah oo laga leeyahay dalka Yeman.

Doonyahaas ayaa waxaa haatan lagu hayaa dekedda magaalada Boosaaso, waxayna sidaan shixnado Kalluun ah oo ay ka dabteen xeebaha Puntland.

Masuul ka tirsan Wasaaradda Kalluumeysiga Puntland ayaa Rochester Somali Tv u sheegay in doonyahaasi ay biyaha Puntland ku soo galeen si sharci darro ah. Lama yaqaan tallaabada laga qaadi doono doonyahan, Waxaana weli socda olole ay weli ciidamada Boolisku ku baadi goobayaan doonyo kale oo noocan oo kale ah oo la sheegay in ay ku sugan yihiin xeebaha Puntland.

Ma aha markii ugu horeysay ee doonyo kalluumeysi oo noocaan oo kale ah lagu qabto Puntland, waxaana jira dhibaato xoog leh oo dadka ku dhaqan xeebaha Puntland ay ka sheegtaan Maraakiib hubeysan oo si sharci darro ah kaga kalluumeyta xeebaha dhow dhow.

Maxamed Cumar Sheekh.

Rochester Somali Tv,Muqdisho.

Mcadde@rstvonline.com