Kulan lagu daraasadeynayay dib u dhiska gobolada dalka Soomaliya  ayaa maanta ka furmay magaalada Jowhar ee xarunta gobolka Sh/dhexe, iyadoo uu furey Ra'isulwasaare Geedi.

Kulankaan oo maanta uu furey Ra'isulwasaaraha dowladda FS Prof.Cali Max'ed Geedi ayaa waxa uu socon doonaa mudo labo cesho ah, iyadoo lagaga hadlayo daraasadda dib u dhiska dalka Somalia.

 Ra'isulwasaare Geedi oo ka hadlay kulankaasi ayaa sheegay in loo baahan yahay in daraasadda la sameynayo lagala tashto dowladda Soomaaliyeed maamulkeeda si loo ogaado baahida ummadda Soomaliyeed ay u qabto.

Geedi ayaa meesha ka saaray in arintaan ay tahay mid lagu raadsanayo mashaariic yar yar oo fadhiga warqado lagu buuxiyo, waxa uuna kula dardaarmay aqoonyahanada Soomaaliyeed oo kaashanaya beesha caalamka in ay hogaanka qabtaan, isla markaana ay soo saaraan baahida rasmiga ah ee ka jirta Soomaaliya .

Geedi ayaa ku dhawaaqay in daraasadaan ay ka bilaabatay maanta magaalada Jowhar, islamarkaana lagu qaban doono gobolada dalka kulamo ceenkaan oo kale ah, isagoo sheegay in marka uu dhamaado kulamada daraasadda lagu sameynayo dib u dhiska dalka Somaliya decumentiyada laga soo saaro in la horgeyn doono sanadka soo socda kulan wadamada deeqaha bixiya ay ku yeelan doonaan magaalada Roma ee wadanka Talyaaniga.

Geedi ayaa ugu baaqay beesha caalamka in ay taageeraan miraha ka soo baxa daraasadaan lagu sameyn doono dib u dhiska Soomaaliya oo dagaalo ay burburiyeen . Gudoomiye K/xigeenka 1aad ee Baarlamanka Prof.Dalax oo hadal kulul ka jeediyay halkaasi ayaa dhaliil  u jeediyay beesha caalamka oo uu ku tilmaamay in qaladaad badan ay ka galeen Soomaaliya sida hay'adda waxbarashada Q.M ee Unesco oo soo daabcday buug lagu aflagaadeynayo beel ka mid ah beelaha Soomaaliyeed, isagoo ku baaqay in la baabi'iyo buugaasi gabi ahaantii .

Dhalxa ayaa kula dardaarmay quburada ka qeybgaleysa kulankaasi in aysan dhicin qaladaadkii horey uga dhacay dalka Soomaaliya xiligii uu dalka uu ka talinayay Marxuum Siyaad Barre oo daraasado la sameeyay lagu qalday gobolo ka mid ah Soomaaliya, isagoo tusaale ahaan u soo qaatay magaalada Afgooye oo laga hergaliyay warshada labanka iyo magaalada Galkacyo oo laga hergaliyay Warshadda Galeyda , taasoo uu ku tilmaamay mid lagu qalday dadweynaha Somaliyeed.

Kulankaan mid la mid ah ayaa waxa uu ka dhacay magaalada Nairobi, iyadoo halkaasi looga dhawaaqay in la bilaabayo kulamo daraasad lagu sameynayo dib u dhiska dalka Somalia

Muxyadiin cali jimcaalle jakuula

jakuula@hotmail.com

muqdisho somaliya