Ilo muhiim ah oo ka soo baxay Ururka Jaamacadda Carabta ayaa waxaa lagu sheegay in Xoghayaha guud Ururkaasi Caamar Muusaa uu booqasho ku imaan doono Soomaaliya markii ugu horeysay tan iyo markii Hogaanka Ururkaasi uu qabtay sanadkii 2001di.

Caamar Muusaa ayaa booqashadiisa dalka Soomaaliya waxaa si rasmi ah loo shaacin doonaa marka ay warbixin gudbiyaan Ergada Jaamacadda Carabta ee dhowaan booqashada ku tagtay Degmada Jowhar .

Caamar Muusaa ayaa waxaa lagu waramayaa inuu doonayo inuu booqasho ku tago dhamaan dalalka carabta ee xubnaha ka ah Ururka Jaamacadda Carabta ka hor inta aanu dhamaan waqtiga Hogaankiisa oo ku eg Bisha March ee sanadka nagu soo aadan 2006-da.

Arintan ayaa waxa ay soo baxday markii Magaalada Jowhar ay booqdeen Wafdi sare oo Jaamacadda Carabta ka tirsan oo uu hogaaminayay Madaxa Qeybta Afrika Iyo Feylka Siyaasadda Soomaaliya Danjire Samiir Xusni ayna ka mid ahaayeen Saalim Alkhuseybi oo ah Ergeyga Xoghayaha Guud ee Jaamacadda Carabta ugu qeybsan arimaha Soomaaliya , Kaaliyaha arimaha Soomaaliya C/lla Mubaarak Alcariimi iyo dhowr diblomaasiyiin Carbeed oo kale .

Wafdigan ayaa intii ay joogeen Magaalada Jowhar waxa ay kulan albaabada u laabnaa ay la yeesheen R/wasaare Cali Maxamed Geedi iyo Madaxweyne C/llaahi Yuusuf , waxaana hakad uu yimid Socdaal wafdigaasi ay ku doonayeen in ay shalay ku yimaadaan Magaalada Muqdisho oo ay ay ku sugan yihiin Wasiiro iyo mudanayaal ka tirsan Baarlamaanka oo uu hogaamiyo Shariif Xasan Sheekh Aadan.

Muxyadiin Cali jimcaalle jakuula

jakuula@hotmail.com

Muqdisho Somaliya