Wararka ka imaanaya maamulka Puntland ayaa sheegaya in madaxweyanaha maamul goboleedka Puntland Jeneraal Cadde Muuse Xirsi uu shaaca ka qaaday inuu wadahadal xaldoon ah la gelayo dhowaan Madaxweyanaha Soomaaliya C/llaahi Yuusuf Axmad.

Cadde muuse ayaa sheegay in wada xaajoodkoodu uu ku saabsan yahay heshiisyadii ay la galeen Shirkadaha shisheeye ee dhowaan madaxda sare ee Dowladda federaalka Soomaaliya ay sheegeen in iyagu ay yihiin cidda la xisaabtameysa isla markaasina geli karta heshiisyada Caalamiga ah.

Jananka ayaa si cad u sheegay in uu madaxweyne Yuusuf kula kulmayo Dalka Imaaraadka Carabta marka uu ka soo laabto dalka Mareykanka oo uu haatan ku sugan yahay, waxaana uu muujiyay inuu diyaar u yahay xalka arintan ku saabsan, hase ahaatee waxaa uusan meesha ka saarin in maamulka Puntland uu u madax banan yahay Qeyraadka gudihiisa ah, isagoo intaa ku daray in waxa ka soo baxa baaritaankan in Soomaaliweyn ay la qeybsan doonto.

Dhowaan ayay aheyd markii ra`iisal wasaaraha dowladda fedraalka iyo madaxweynuhu ay shaaca ka qaadeen in baaritaanka Shirkadaha Caalamiga ah ee puntland ay heshiisyadooda leedahay dowladda dhexe, iyadoo qaar ka mida maamulka Puntland ay ka bixiyeen jawaab kulul, taasoo aheyd in Ra`iisal Wasaare Geedi uu raaligelin ka bixiyo hadalka ka soo yeeray, waxaana ay tilmaameen in maamulka Puntland uusan cidna uga heybeysaneyn arimahooda