Xafladda dib loogu furayay Safaradda Biljimka ayaa waxaa ay ka dhacday dhismaha Xarunta Dowladda ay ku leedahaya degmada Jowhar .

Gudaha xarunta ay xafladda ka dhaceysay ayaa waxaa ku sugnaa Xubno badan oo ka tirsan Dowladda FS iyo Haweeneyda Safiirada ka noqoneysa Safaaradda Cusub ee Biljimka uu ku yeelanayo Magaalada Jowhar Mss. Kiristiino Abuno Smober ayaa waxaa laga dhex suray Calanka Madowga , Huruuda iyo jaallaha ka kooban ee Biljimka , iyadoo halka dhinaca kale uu ka surnaa Calanka baluugan ee xidigta Shanta geesoodka leh ee Soomaaliya , waxaana heesta Calanka Biljimka halkaasi ka garaacay kooxda Baambeyda qaranka Soomaaliyeed oo iyagu dhowaan ka goostay xaruntii ay ku lahaayeen Muqdisho una guuray dhinaca Magaalada Jowhar.

Markii ay dhamaatay xafladda ayaa waxaa xarunta Guriga Madaxtooyada ku kulmay Madaxweyne C/llaahi Yuusuf iyo Safiirka Cusub ee Biljimka ee Soomaaliya Mss. Kiristiino Abuno Smober ayaa si rasmi ah ugu wareejisay Madaxweyne Yuusuf Warqadaheeda Safiirnimo , waxa ayna sheegtay inay aad ugu faraxsan tahay inay maanta ay joogo gudaha dalka Soomaaliya .

Madaxweyne C/llaahi Yuusuf ayaa isna kulankaasi ka sheegay inuu aad ugu faraxsan yahay in dalka Biljimka uu noqdo dowladii ugu horeysay Safaarad dib uga furata Soomaaliya muddo 15 sano ka dib marka laga reebo xafiisyada Midowga Afrika iyo Jaamacadda Carabta ay ka furteen Magaalada Jowhar oo 90 KM dhinaca Waqooyi kaga toosan Caasimadda Soomaaliya