Magaalada Baraawe ayaa maanta waxaa ka furmay kulan dhexmaraya wasiiro xildhibaano iyo mas’uuliyiin ka kala tagay magaalooyinka Muqdisho, Kismaayo iyo gobolka Sh/hoose.

Kulankan oo ay soo qabanqaabiyeen maamulka gobolka SH/hoose ayaa lagu sheegay in looga hadlayo arrimo kala duwan oo quseeyo xaaladaha taagan iyo arrimo la xiriira isbaheysiga, iyadoo sidoo kalena looga hadlayo dhibaatooyinka ka taagan wadada weyn ee isku xirta Jubbooyinka iyo Muqdisho.

Guddoomiyaha gobolka Sh/hoose Yuusuf Maxamed Siyaad “Indha Cadde” oo qadka Telfoonka HornAfrik ugu warramay ayaa sheegay in kulankaas uu socon doono in ku dhow Toddobaad ayna soo xaadireen xubnihii muhiimka ahaa ee kulankaas ka qeybgalayey.

Sidoo kale Yuusuf Indha cadde waxaa kale oo uu sheegay in kulankaas looga hadlayo danaha guud ee ummadda oo dhinac walba quseeya.

Xubnaha soo gaaray magaalada Baraawe ayaa waxaa ka mid ah wafdi uu hogaaminayo xildhibaan Xasan Dhimbil Warsame oo ka yimid dhinaca magaalada Muqdisho waxana ka mid ah xubnaha uu horkacayo xildhibaan Yuusuf Mire Seeraar, Gen Joon Dhoore, Col. Nuur Xuseen “Nuur Daqsiin”, Salaad Cismaan Rooble, Maxamuud Too Too iyo xubna kale oo ka tirsan dowladda fedraalka, saraakiil iyo waxgarad kale.

Dhinaca magaalada Kismaayo ayaa waxaa ka yimid wafdi uu horkacayo wasiirka dib u dhiska iyo dib u dajinta ahna guddoomiyaha isbaheysiga dooxadda Jubba Barre Aadan Shire Hiiraale iyo taliyaha ciidanka Isbaheysiga Maxamed Rooble Jimcaale “Goobaale.

Kulankan oo maanta furmay ayaa hoteelada magaalada Baraawe waxaa buux dhaafiyey marti aad u badan oo kulankaas u timid magaaladana ay ka muu qaneyso iney ka tiro badan yihiin dadka soo buux dhaafiyey