Iyadoo kooxaha hubeysan ee Soomaalida lagu soo waramayo in ay weli hub helayaan, tiiyoo ay jirto xayiraad la soo rogay sanadkii 1992-kii, ayaa xoghayaha guud ee Q.M Kofi Annan waxa uu mar kale magacaabay afar xubnood oo ka mida kooxda kormeeraysa cunaqabateynta oo golaha amaanka ee Q.M uu mar kale codsaday.

warqad ku socotay madaxweynaha golaha amaanka oo shalay la aqriyey, ayaa Mr. Annan waxa uu ku magacaabay afar khuburo ah oo la soo shaqeeyey bishii tagtay kooxda kormeerayaasha, si loo baaro mudo lix bilood oo kale ah xaalada hubka ee wadanka Soomaaliya.

Khuburadaasi ayaa waxa ay kala yihiin Melvin Holt, Jr., oo Mareykan ah iyo Joel Salek oo u dhashay wadanka Colombia, kuwaasoo xubno ka ahaa gudigii loo saaray arrinta Soomaaliya ilaa markii la dhisay kooxdooda horaantii sanadkii hore ee 2004-kii, waxaa kaloo ragan iminka dib loo magacaabay ka mida Harjit Singh Kelley oo u dhashay wadanka Kenya, oo mar ahaa khabiir ka soo shaqeeyey cunaqabateyntii la saaray Liberia iyo Bruno Schiemsky oo u dhashay wadanka Belgium, oo isna qeyb ka ahaa koox kormeeraysay xayiraadii la saaray dalka Jamhuuriyada Dimoqraadiga ee Congo.

Golaha amaanka ayaa ka codsaday Mr. Annan inuu dib u aasaaso koox kormerayaal ah oo lagu qalabeenayo awoodo badan oo ay ku jirto in baaris lagu sameeyo waxyaabaha ka hirgelay xayiraada hubka iyo xadgudubyada lagu sameeyo labadaba, iyadoo xarumo baaritaan laga sameenayo gudaha Soomaaliya.

Gudiga, oo fadhigiisu yahay dalka Kenya, ayaa ay tahay in uu sidoo kale qiimeyn ku sameeyo ficilada ay ku dhaqaaqayaan mas’uuliyiinta Soomaalida iyo wadamada kale ee xubnaha ka ah Q.M, gaar ahaan dalalka deriskala ah Soomaaliya inay si buuxda u dhaqan geliyaan xayiraada hubka ee saaran Soomaaliya.

Kooxdan iminka dib loo magacaabay ayaa ku tilmaamay awoodooda baaris inay gaarsiisan tahay inay si aad ah ula socdaan hubka soo galaya ama ka baxaya Soomaaliya, xaga dhulka, hawada iyo badda, iyadoo sidoo kale ilo gaar ah lagu haynayo qab qablayaasha dagaalka hogaamiye kooxeedyada iyo ganacsatada.

Sida lagu sheegay warbixintan oo ka soo baxay xafiiska Kofi Anan, waxaa kormeer lagu sameenayaa suuqyada hubka lagu iibiyo ee Soomaaliya, si loo ogaado noocyada hubka ay soo galay iyo halka uu ka soo galay.

Muxyadiin Cali jimcaalle jakuula

jakuula@hotmail.com

Muqdisho Somaliya