C/laahi Yuusuf Axmed oo dawlada Yaman ka dalbaday in ciidamo ay usoo dirto Somaliya

 Madaxweynaha dawlada federalka ku meelgaarka ah ee Somaliya C/laahi Yuusuf oo iminka booqasho ku jooga magaalada Sanca ee xarunta wadanka Yaman ayaa xukuumada  yaman ka codsaday in ciidamo nabada soo celiyo  usoo dirto Somaliya .

Madaxweynaha Somaliya ayaa jariidada Althowra ee kasoo baxda Yeman wareysi ay la yeelatay  ku sheegay in dawlada Yaman uu ka dalbanayo in ciidamo ay ku deeqdo kuwaas oo ku biiriya ciidanka Midowga Afrika kasocda oo ay ugu horeeyaan kuwa Sudan iyo Uganda Madaxweyne Somaliya waxaa kaloo uu wargeyskan u sheegay in uu dib ugu laaban doono Somaliya ka dib marka uu dhameysto booqashadan uu Yaman ku joogo.

Dhanka kale raisulwasaaraha dawlada Yaman C/qaadir Bajamal ayaa kulamo goonigooni ah lakala yeeshey madaxweynaha Somaliya C/laahi Yuusuf Axmed iyo gudoomiyaha barlamaanka Sharif Xasan Sheekh Aadan si uu u ogaado khilaafaadka ka dhexeeye labadooda heerka uu le’gyahay .

 Gudoomiyaha barlamaanka ayaa ra’sulwasaaraha Yaman u sheegay in asagu uu kasoo horjeedo labo qodob oo kaliya kuwaasoo oo kala ah keenista ciidan ka socda Safka hore  iyo ka weecashada magaalada Muqdisho. Madaxweynaha iyo gudoomiyaha ayaa labaduba sheegay in si aad ah u qadarinayaan dadaalada xukuumada iyo hogaanka dawlada ay wadaan .

 Raisulwasaaraha Yaman C/qadir Bajamal  ayaa sheegay in xukuumada Yaman iyo hogaankeeda ay ka shaqeyndoonaan sii dhaqaajinta tashiilaadka Afrikanka iyo carabtuba si loo caawiyo howlaha nabad soo celinta Somaliya.Raisulwasaaraha Yaman ayaa sidoo kale sheegay in amaanka gobolka iyo deganaashihiisuba uu ku xiran yahay amaanka dawladaha gobolka oo dhan asagoo intaa raaciyey in uu jecelyahay in uu arko Somaliya oo ku naalooneysa amaan iyo midnimo qaran oo dhameystiran.

 Maalinta barri ah ayaa la filayaa in kulan fool ka fool ah la isku soo  hor fadhiisiyo madaxweynaha iyo gudoomiyaha barlamaanka si loo soo afjaro khilaafaadka ka dhex jira dawlada federaalka ku meel gaarka ah ee Somaliya.

 

Geedi iyo Maxamed dheere oo kulan albaabadu u xiran yihiin qaatay

Raisulwasaaraha dawlada federaalka ku meelgaarka ah ee Somaliya Cali Maxamed Geedi oo maalintii shaley aheyd soo gaaray magaalada Jowhar ayaa xalay kulan ay albaabadu u xiran yihiin la yeeshay gudoomiyaha gudiga siyaasada gobolka shabeelaha dhexe  Maxamed Cumar Xabeeb Maxamed dheere .

 Kulankan oo saacado qaatay ayaa la sheegayaa in labada mas’uul ay uga wada hadleen qaabka ay dawladu ugu shaqeyn karto magaalada Jowhar iyo sidii loo soo dhaweyn lahaa xubnaha kale ee dawlada ka socda ee  filaya in ay soo gaaraan magaalada Jowhar  maalmaha soo socda iyo sidii loogu diyaarin lahaa goobihii ay dagi lahaayeen .Raisulwasaaraha ayaa iminka dagan xarunta maamulka gobolka ayadoo wafdigii kale ee la socdayna ay degenyihiin hotelka Saabir.,waxaana haatan magaalada ka soconaya diyaarinta goobihii hore ee dawlada kuwaas oo la filayo in xubnaha dawlada ay kusoo dagaan xarunna ay u noqoto.

Markii ugu horeysay ayaa magaalada Jowhar lagu dhex arkay ciidamo hubeysan oo ilaalo xoogan ka haya goobaha xubnaha dawladu ay degenyihiin ayadoo horey ay mamnuuc u aheyd hub ku dhexsidashada magaalada gudeheeda.

 

 Maxamed Cumar Sheekh (Maxamed Cadde)

  RSTV. Muqdisho