Maleeshiyooyin ka Amar qaata Col.Barre Hiiraale ayaa xalay weerar hubeysan ku qaaday aqalka magaalada kismaayo uu ka daganyahay G/sare Cabdi Cigaal oo ka mid ah saraakiisha sare sare ee isbaheysiga D/jubba.

Col. Cabdi Cigaal Jaamac oo u waramay saxaafada Muqdisho ayaa waxa uu xaqiijiyay in weerarkaasi dhinaciisa dhaawac uu ka soo gaaray mid ka mid ah maleeshiyadiisa, halka dhinaca kale la sheegay in iyana mid kale uu ka dhaawacmay.

Cabdi Cigaal ayaa waxa uu ku tilmaamay weerarkaasi lagu soo qaaday in uu ahaa mid la doonayay in isaga lagu qaarjiyo oo uu ku eedeeyay in ay soo agaasimeen mas’uuliyiinta isbaheysiga D/jubba.

Saraakiil ka tirsan Isbaheysiga D/jubba ayaa iyagu beeniyay in weerar lagu qaaday Guriga Col.Cabdi Cigaal, iyagoo ka gabsaday in wax faahfaahin ah ay ka sii bixiyaan iska horimaadkaasi.

Weerarkaasi oo dhacay xalay fiidnimadii ayaa waxaa laga maqlayay magaalada Kismaayo sawaxanka Rasaasta ay isbdhaafsadeen ilaalada G/sare Cabdi Cigaal iyo maleeshiyooyinka Isbaheysiga D/jubba.

Maleeshiyooyinka Beesha uu ka dhashay Col. Cabdi Cigaal ayaa lagu soo waramayaa in ay isku uruursanayaan gudaha magaalada Kismaayo, iyadoo laga cabsi qabo in dagaal uu ka dhaco magaaladaasi.

Arintaan ayaa waxa ay ku soo beegantay Xilli dhowaan uu saxaafadda u sheegay Col.cabdi Cigaal in magaalada Kismaayo aan lagu qaban Karin kulan lagu heshiisiinayo labada garab ee dowladda FS ee ku kala sugan Muqdisho iyo Jowhar, isagoo si kulul u sheegay in masiirka magaalada Kismaayo aan lagala tashan Karin Col.Barre Hiiraale.

Si kastaba ha ahaatee kulankii la doonayay in uu ka dhaco magaalada Kismaayo ayaa u muuqda mid qabsoomidiisa ay soo wajaheen caqabado ka dhashay murano u dhaxeeya mas’uuliyiinta isbaheysiga D/jubba.,

Muxudiin Cali Jimcaale Jakuula

Muqdisho

Jakuula@hotmail.com