Xubna ka tirsan labada gole ee Dowlada FS uu hogaaminayo wasiirka dhaqan celinta maleeshiyooyinka Bootaan Ciise Caalin, Bulshada Rayidka, Haweebka Gobalka Banaadir, Guddoomiya G/Sh/Hoose Yuusuf Maxamed Siyaad "Indhacade", iyo xubno kale ayaa waxa ay u baxeen saakay in ay qaadaan isbaarooyinka daadsan gudaha muqdisho iyo wailba jidadka soo gala.

11 Barqanimo xiliga Soomaaliya ayaa waxaa lagu guuleystay in la qaado isbaaradii ugu horeysay oo tiilay Siinka Dheer ee Afgooye halkaasoo ay ku sugnaayeen ciidamada booliska oo amar ka qaataan Taliya cidanka booliska Cabdi Xasan Cawaale "Qeybdiid" iyo waliba duqa magaalada Muqdisho Ibraahim Shaaweeye, durbadiiba waxaa qudbad halkaas ka jeediyeen Wasiirka dhaqan celinta maleeshiyooyinka Bootaan Ciise isagoo sheegay in aysan meeshaan aheen isbaaro balse ay aheed meel Checkpoint oo amaanka lagu sugayay.

Waxaa xusid mudan in lagu guuldareystay in la qaado isbaarooyin yiilay inta aan la soo gaarin Siinka dheer ee Afgooye, iyadoo maleeshiyooyinkii halkaas ku sugnaa markeey u jeedaan gawaarida siday xubnaha isbaarooyinka qaadaya ay u firaaqeynayaan goobaha ay ku sugan yihiin markii laga gudbana halkooda ku soo laabanayaan, taasina waxay keentay in odayaal ay isku heeb yihiin maleeshiyooyinkaas loo diray si ay ugu qaadaan isbaarooyinkaas, hadiise ay odayaasha loo diray wax ka maqli waayaan waxaa go’aan lagu gaaray si xoog ah in loogu baabi’iyo isbaarooyinka ay ku sugan yihiin lana xirxiro iyaga iyo hubkoodaba.

Durbadiiba waxeynu u soo baqoolnay dhinaca magaalada muqdisho qaasatan degmada Madiina, ugu horeyn waxaa la qaaday isbaaro tiilay Wadada Siliga Ameerikaanka oo maleeshiyada ku sugneed isku heeb yihiin Wasiirka Ganacsiga Al-Xaaji Muuse Suudi Yalaxoow, waxaana halkaas nagu soo dhaweeyay Taliya maleeshiyooyinkii isbaaradaas ku sugnaa ninka lagu magacaabo Cali Sheekh waxuuna sheegay in maanta waxii ka dambeeya aysan wax lacag ah ka qaadi doonin gawaarida isticmaasha wadada isbaarada u tiilay.

Waxeynu u soo baqoolnay dhinaca Hotel Saxafi oo Labada Gole Dowlada FS ee degan yihiin, balse intii aan jidka ku soo jirnay ayaan aragnay isbaaro tiilay Meesha loo yaqaan Cakaaro oo markii aan sii maraynay maleeshiyaadkii halkaas ku sugnaa ay ka ordeen fadhiisintooda balse markii aan soo laabanay aan aragnay iyagoo gawaari halkaas mareysay lacago ka qaadanayay, waxaana u soo degay Guddoomiya Gobalka Banaadir C/laahi Ganey "Frimbi" iyo Taliya Ciidanka Booliska Cabdi Xasan Cawaale "Qeybdiid" oo ay isku heeb ahaayeen maleeshiyaadkii isbaaradaas ku sugnaa, labadaan masuul ayaa si aad ah u canaanteen maleeshiyaadkii qoryahii ay wateen ka soo qaadeen iyadoo lagu xiray maleeshiyaadkaas Xarunta CID ee muqdisho, sawabta loo xiray maleeshiyaadkaan oo kuwii aynu soo dhaafnay loo xiri waayay ayaa waxaa lagu sheegay markii la sii marayay in ay is qariyeen laakin soo laabadkii lagu arkay iyagoo jooga isbaaradaas.

Haddaba waxaa dhinaca kale maanta soo ifbaxay isbaarooyinkii shalay la qaaday wadada Wadnaha ee 4 isbaaro gaaray ay mid ka mid ah oo tiilay Wadada Jidka Mareexaanka ay lacagahii horey loogu qaadi jiray ay ka qaadayeen saakay gawaarida isticmaasha wadada wadnaha, isbaaradaas oo maleeshiyaad jooga ay ka amar qaataan wasiir arrimaha gudaha ahna Ra’iisul wasaare K/xigeenka Xuseen Maxamed Faarax Caydiid, waxaana arintaasi ay dhalisay in shaqo joojin ay sameeyaan Gawaaridiii isticmaali jirtay wadada wadnaha oo dhan, waxaana indhaheeyga qabanayeen dadweyne aad u fara badan oo u badnaa ardayda wax ka barata gobalka banaadir oo cagaha maalaya ama lugeynaya ka dib markii ay waayeen gawaaridii ay raaci jireen.